Segun Parlamentario Evelyn Wever-Croes:
ORANJESTAD (AAN): Parlamentario Evelyn Wever-Croes a contradici e impresion cu Gobierno AVP Futuro ta crea, cu costo di bida a subi mas bou di Gobierno di MEP. Den un publicacion riba Facebook, Wever-Croes a indica cu, segun cifranan di Centraal Bureau voor de Statistiek CBS Aruba, inflacion pa periodo 2025-2026 a subi cu 2.4%. Si compara esaki cu un aña prome, el’a subi cu 0.6% riba e periodo di 2024-2025.
Segun e parlamentario, esaki ta nifica cu inflacion actualmente ta cuatro biaha mas halto cu un aña prome. Cu e comparacion aki, Wever-Croes ta cuestiona e manera cu Gobierno AVP Futuro ta presenta e situacion di costo di bida y ta acusa gobierno actual di a gaña votadornan durante campaña electoral y tawata culpa Gobierno di MEP pa aumento di costo di bida. E parlamentario a califica e situacion como “kiezersbedrog”, esta engaño electoral.
“Anto gobierno AVP Futuro kier pa bo kere cu Aruba no a conoce inflacion den nan gobernacion? Esey ta pasa ora bo a campaña cu costo di bida a subi pa culpa di gobierno di MEP, siendo cu inflacion bou gobierno di AVP Futuro ta 4 biaha mas halto. Esey nos ta yama kiezersbedrog”, Parlamentario Wever-Croes a skirbi.
