Segun Otmar Oduber, Lider di PPA:
ORANJESTAD (AAN) — Otmar Oduber, Lider di Partido PPA, den un entrevista cu p’e ta hopi cla, y cu den campaña nan a para p’e, cu RAft ta e Rijkswet pa loke ta trata e supervision financiero di Pais Aruba, cu ta inaceptable.
“E lo a kita tur e derechonan, entre otro, cu nos tin aworaki e presion cu mester wordo pasa prome cu dia 31, tin un base legal p’e, propio Parlamento di Aruba a pasa e Ley di LAft, den e caso aki ‘Landsverordening Financieel Toezicht Aruba’ caminda cu den dje ta pone deadline pa loke ta tratamento di presupuestonan”, Otmar Oduber a señala.
El a expresa cu Hulanda ta completamente den su derechonan, conforme leynan local. Pasobra asina nos a bisa: den Parlamento di Aruba mester percura pa e normanan cu nos kier pone pa e aspecto financiero wordo poni den leynan local. “El a wordo haci den e LAft e tempo ey cu mayoria a pas’e y nos mester cumpli cu ne! Esey tin nos caminda cu nos ta cu e problema cu nos tin cu Hulanda. Hulanda no ta confia ni kere den politica di Aruba, den ningun di nan, pasobra cada biaha nos ta haci compromisonan y e biaha aki nos a bay mas leu cu compromiso, nos leynan local nos a hinca den e LAft, pero nos no ta cumpli cu ne”, Otmar Oduber a remarca.
El a agrega cu e presupuesto ta na gobierno, entrega na Parlamento segun e na September aña pasa, e ta cla pa wordo trata. “Nos ta drentando Maart y ainda e Ley di Presupuesto no ta wordo trata. Hulanda cu su razon ta bisa bo ‘tende, mi ta pone un dead line pa bo trat’e, si no, conforme LAft mi ta pone un maatregelen riba bo, of un KV, of whatever medida cu e por pone riba nos”, Otmar Oduber a acentua. Esaki pasobra, na prome lugar, Aruba no ta cumpliendo cu e propio leynan cu e mes ta pone, y di dos, CAft ta constata cu e presupuesto cu ta wordo presenta e cifranan di loke nan yama “uitvoerings Orgaan” e rapportnan cu ta tuma lugar, ta resulta cu e presupuesto lo tin, aparentemente, casi cien miyon extra den un vorschot, pues 100 miyon mas di e presupuesto cu Gobierno a entrega.
“Anto CAft ta puntra con ta posible cu uno, bo no ta cumpliendo tampoco cu e rapportnan cu nos a aconseha cada termino, gobierno ta bayendo atras y esey ta un di e reclamonan mas grandi, pero fuera cu bo ta cay atras bo ta intransparente cu Parlamento di Aruba, den bo presupuesto, pasobra bo tin 100 miyon extra, pero di otro banda bo ta haciendo gastonan a base di e 100 miyon ey”, Otmar Oduber a trece dilanti.
