Parlamentario Dangui Oduber:
Pensionadonan a haya cara abou y 200 famia ta keda sin cas social
ORANJESTAD (AAN): Diabierna ultimo Parlamento di Aruba a trata presupuesto 2025. Un presupuesto cu a wordo traha y laga atras pa Gabinete Wever-Croes II, caminda nos a percura di laga 500 miyon florin atras den caha de gobierno pa e gobierno nobo. Contrario na ora nos a drenta den gobierno na aña 2017 caminda nos a haya e caha bashi bashi y pais Aruba cu un debe di casi 6 biyon florin. Nos a haya un presupuesto e tempo ey cu un deficit di casi 500 miyon. E solo hecho aki ta mustra e diferencia fundamental entre un gobierno drechi di MEP y un gobierno sin gevoel y iresponsabel manera esun di AVP.
Durante e tratamento di presupuesto e gobierno nobo di AVP sin futuro a presenta un nota di cambio y nos a spera cu teniendo cuenta cu nos a laga atras 500 miyon, nos a spera cu e promesa haci na pensionadonan cu nan lo haya un aumento di 700 florin lo wordo cumpli. Pa nos sorpresa esaki NO tabata e caso y pensionadonan a haya un cara abou caminda e gobierno nobo a dal nan un daks den wowo. Esaki tabata e momento pa promer minister Mike Eman cumpli cu e pensionadonan paso tabata tin 500 miyon florin cu nos a laga atras den caha. Kiermen pensionadonan a wordo engaña y defrauda pasobra e 700 florin NO lo wordo cumpli cune ni awe ni den e promer 100 dianan manera a wordo priminti.
No solamente esaki sino ayera minister Wever, cu ta e minister cu ta representa comercio, a saca for di presupuesto 20 miyon florin cu tabata destina pa construccion di casnan social y duna rebaho pa cubri gasto di huur pa esnan cu no por pag’e. Imagina 2 partido cu a campaña cu lo mehora e poder di compra y baha costo di bida ta kita for di presupuesto 20 miyon pa esnan den menos recurso tin dak riba nan cabes, lo mas basico cu un famia mester pa biba cu ta un cas. Un gobierno anti pueblo so por haci algo asina aki.
Pa completa e asunto ningun caminda den e presupuesto nos por a nota cu a inclui un subsidio pa esnan di menos recurso cu NO por paga e prijs di gas cu minister Wever a regala pueblo valentine’s day. Ta fresco den nos memoria con minister Wever cu hopi orguyo a aumenta e prijs di gas cu 30% cu awe e prijs di botter di gas residencial a bira 80 florin. E mesun minister Wever cu a bisa cu frigidiarenan na Aruba ta bashi awe ta laga pueblo den un situacion penoso cu ni cushina nan NO por cushina mas. Tristo un minister cu nunca a percura pa diversifica nos economia ta castiga pueblo di e forma aki sabiendo cu AIB cu ta doño di Arugas a haci un ganashi di 13 miyon florin. Un minister cu su unico interes ta defende comercio y no e clase trahado.
FCCA, a elimina e fiansa di 17 miyon na FCCA pa nan traha 150 pa 200 cas social riba termino corto; consecuencia no ta bin cas social riba termino corto. Nan kier bay studia prome pero no tin mas tempo pa warda. Pesey nos a bin cune den presupuesto.
2. A corta 2.7 miyon pa cubri gasto di huur pa esnan cu ta huur un cas social di FCCA; consecuencia: esnan cu ta huur cas social di FCCA mester bai paga mas huur.
3. No lo bay cumpli cu e aumento di pensioen di 700 florin pa luna dentro di 100 dia; lo duna 250 florin y despues depende con bay cu Hulanda, lo wak si lo duna mas.
4. Apesar cu tur rapport ta duna conseho negativo contra di e 30 miyon florin pa inversion, toch nan ta hacie; consecuencia: 30 miyon ta bay den un fondo sin cu tin regla ni control, y por bira un ripiticion di “Bo Aruba”, “Fondo desaroyo San Nicolas” caminda tabatin hopi corupcion (casonan di Benny y Tico Croes).
5. AVP a vota contra pa duna 3 miyon florin extra pa 6 fundacion riba tereno social, cu basa riba estudionan mester di e placa, entre otro pa salud mental, y contra abuso di mucha y di hende muhe.
6. Ta corta 6.3 miyon florin den Husticia, despues cu 2 siman pasa parlamento unanimamente a pasa un mocion pa inverti MAS den husticia
7. Ta corta 2.9 miyon florin den enseñansa y deporte.
8. Ta corta 1.4 miyon florin den salubridad publico.
9. AVP ta pro rijkswet pa duna Hulanda mas di bisa den nos finansas siendo cu semper nan a bisa di ta contra.
Nos por conclui cu e gobierno nobo di AVP sin Futuro a cuminsa gebolter y cu mesun modus operandi! Nan a cuminsa cu 2 driver, nan a cuminsa incompleto (1 minister NO por a huramenta) y nan a cuminsa sin nomber y fam!
