Parlamentario Dangui Oduber:
ORANJESTAD (AAN): Diabierna ultimo tabata un dia scur den augustus pa pais Aruba. E tema di Rijkswet tin 5 aña caba den discusion y netamente pesey tanto fraccion di MEP como fraccion di PPA a pidi un reunion publico 5 luna pasa pa Parlamento di Aruba por debati riba e tema aki.
Pa nos sorpresa gobierno di Aruba a presenta diabierna ultimo den parlamento y a infoma Parlamento cu e ‘rijkswet’ ya ta un done deal pasobra prome cu nan a bin parlamento ya caba a manda e proposicion di e rijkswet pa Conseho di minister di reino cu consecuentemente a aproba esaki sin cu Parlamento di Aruba mes por a wak'e.
Loke gobierno a haci ta anti constitucional, anti democratico y falta respet pa e organo di mas halto na Aruba. Con por ta posibel ta ‘’bypass’’ Parlamento riba un tema asina fundamental cu nos autonomia y libertad. Nos ta condena e manera di procede di gobierno di Aruba como tambe di presidente di parlamento pa schors e reunion tot nader orde. Gobierno di Aruba a traiciona nos Libertad, traiciona nos status aparte y traiciona nos autonomia.
Ora bo lesa e contenido di e rijkswet bo ta conclui cu esaki ta entrega di e yabi di gobernacion na Conseho di minister di reino. Den e rijkswet ta para cu esun cu ta ‘eindverantwoordelijk’ pa nos presupuesto ta e minister di Reino Hulandes y no e minister di finansa di Aruba. Nos mester corda pueblo cu e rijkswet ta un ley di Reino cu Parlamento di Aruba NO tin derecho di vota y cu esaki tambe ta kita nos voz, e voz di pueblo y nos derecho di voto. Ta 150 miembro den Tweede Kamer na Den Haag lo vota sea na fabor of contra e Rijkswet aki. Cu esaki nos autonomia y libertad di voto como Parlamento ta wordo kita!
Den e rijkswet ta poni cu ora tin cambio den e presupuesto ta Conseho di minister di Reino lo dicidi si lo aproba cambio si of no. Ban pone den futuro gobierno kier construi un di dos aeropuerto priva na San Nicolas, NO ta nos ta dicidi esaki mas como pais sino gobierno di Hulanda. Mas condenabel ta e hecho cu e Rijkswet aki ta manera Hotel California, unabes acepta esaki nunca mas lo sali for di esaki.
Un gobierno cu tin solamente 40% di e electorado NO tin e mandato pa entrega nos libertad y autonomia. Mas pio ta e hecho cu e gobierno aki cu solamente 40% di mandato a negosha e entrega di autonomia aki cu e gobierno Hulandes cu tin solamente 32% di e electorado. E cos aki ta totalmente robes y nos NO por acepta con facil ta entrega nos libertad y autonomia.
