Parlamentario Shailiny Tromp-Lee:
*Nan a haya 6 oportunidad pa informa Parlamento cu ya nan a firma Rijkswet HOFA
ORANJESTAD (AAN): E hecho cu Gobierno AVP-FUTURO a entrega e concepto Consensus Rijkswet sin consulta y sin consensus di Parlamento, Parlamentario Shailiny Tromp-Lee ta remarca cu un otro concepto cu ta haci esaki inaceptabel y inhustificabel ta e solo hecho cu ya for di dia 13 di augustus 2025, Gobierno a bay di acuerdo cu e contenido di e ley HOFA aki.
Esaki segun e parlamentario, no ta un informacion cu Gobierno a duna durante e reunion di dia 29 di augustus ultimo. E fecha aki a bin na claridad door di lesa y studia e documentonan na unda den e documento di Ministerie van Binnenlandse Zaken en Koninkrijksrelaties por a saca afo cu riba e fecha di 13 di augustus 2025, ya caba Gobierno a bay di acuerdo cu e contenido di e rijkswet.
Inaceptabel y inhustificabel ta tambe, Parlamentario Tromp-Lee a enfatisa, cu Gobierno tawatin e oportunidad di informa Parlamento no un biaha, ni dos, sino 6 biaha. “Na 6 ocasion, Gobierno tawata tin e oportunidad pa informa Parlamento riba e ley importante aki”.
E Parlamentario a agrega cu Gobierno di Aruba intencionalmente a bin ta gañando Parlamento di Aruba. Gobierno a firma y a bay di acuerdo dia 13 di augustus, y ta te dia 29 di augustus a informa esaki, mientras cu tawatin diferente (5 total) reunion publico den Parlamento entre 13 y 29 di augustus.
“Den tur e reunionnan aki, Parlamentarionan, sigur esunnan di oposicion a haci varios pregunta y na ningun momento, Gobierno tabatin e decencia pa informa Parlamento cu ya caba nan a firma bay di acuerdo, nan a firma y a entrega esaki na Conseho di Minister di Reino. Esaki ta un falta di respet pa Parlamento di Aruba. E situacion aki ta un muestra di un arogancia inaceptabel na unda cu Gobierno di Aruba a pasa nan propio fraccionnan un ‘fast ball’. Esaki ta algo inaceptabel”, Parlamentario Tromp-Lee a enfatisa.
