Parlamentario Xiomara Maduro ta informa durante tratamento di Presupuesto 2025:
ORANJESTAD (AAN): E ta conoci cu partido AVP nunca a traha un cas social pa esnan den mas necesidad. Mike y AVP a percura pa traha un megadebe pa Aruba den gabinetenan Eman I y II, sinembargo ni un florin di e miyones ey a bay pa traha cas social pa esnan cu mester un dak pagabel riba nan cabes.
E mal desicion aki ta locual awe ta causa un crisis den vivienda social, na unda cu tin 3.700 peticion na FCCA pa yega na un cas. FCCA lamentablemente no por cumpli pa motibo di no por yega na fondo barata via gobierno pa por traha e casnan na un prijs razonabel.
AVP a crea un crisis pa cas social
Ta bon pa splica cu no ta di awo FCCA tin necesidad pa yega na fondonan barata. Tabata na aña 2009 cu Gabinete Oduber di MEP a fia FCCA 10 miyon florin di e placa di Plant N.V. na interes reduci di 2% pa asina FCCA por a traha casnan social. Di e placa aki FCCA a tuma 2 miyon florin pa cuminsa traha, pero bou di gabinete Eman I y II no por a haya mas fondo.
Te na aña 2016, Mike a dicidi pa regala FCCA tur e casnan social cu gobierno mes a yega di traha, como un sorto di pago na FCCA, ya cu FCCA por a bende nan cu esnan cu pa hopi aña tabata huur e casnan na un prijs barata. Sinembargo esaki no a produci e fondonan necesario pa cubri e necesidad financiero pa traha otro casnan na prijs pagabel. Banda di esaki FCCA pa mas di 40 aña no por a indexa e prijsnan di e casnan social, como cu gobierno no a subi e subsidio cu FCCA ta haya. Tur esaki a crea un crisis pa FCCA por brinda casnan social na comunidad.
Tur instancia ta adverti cu mester yuda FCCA
No ta solamente FCCA ta ‘trek aan de bel’ cerca gobierno pa e falta di casnan pagabel. Banco Central di Aruba na varios ocasion a pidi atencion pa e situacion di falta di casnan pagabel. E metanan di desaroyo sostenibel, SDG 11, tambe ta exigi gobiernonan pa inverti den casnan pagabel. Sin lubida cu IMF den nan evaluacion financiero y economico di Aruba, Article IV Mission, tambe ta evalua kico Aruba ta haci pa cumpli cu e necesidad pa por tin suficiente casnan pagabel na Aruba.
MEP ta pone fondo y AVP apoya pa Futuro ta bolbe crea mas crisis
Gabinete Wever-Croes di MEP a percura pa despues di a stabilisa Aruba su economia y finansa publico, pa pone 17 miyon florin di e surplus di aña 2025 disponibel pa un fiansa barata na FCCA pa por cuminsa traha entre 150 pa 200 cas social. Banda den esaki a reserva 2,7 miyon florin pa FCCA no mester hisa e prijsnan di e casnan social. Lamentablemente den e prome 8 ora cu Gabinete Eman III a tuma mando, AVP apoya pa Futuro ta kita e 17 miyon florin y e 2,7 miyon florin, y ta laga FCCA sin placa atrobe pa traha casnan pagabel y cu un probabel subida di huur di casnan social. Di e manera aki, Futuro na su prome salida den gobernacion ta ripiti e mesun mal ehempel di AVP, di no traha ningun cas social y crea mas crisis di vivienda pa esnan di mas necesidad den comunidad.
