Parlamentario Heyliger, fraccion AVP:
ORANJESTAD (AAN)-- Parlamentario di fraccion di AVP, y miembro di e Comision encarga cu Serlimar Suigeneris, Clifford Heyliger, den entrevista cu DIARIO a referi tambe na e segmento di nos ciudadanonan cu no ta pagando pa e servicio di recogemento di sushi, for di Serlimar, sino cu nan a scoge pa tira sushi den mondi.
Heyliger a bisa cu esaki ta comprendible pasobra enberdad tin hende cu no tin placa, cu ta den un situacion dificil, y riba e punto aki Serlimar tambe elabora durante nan reunion reciente.
Serlimar a splica cu nan tin areglo di pago, tambe prijs special pa esnan cu ta biba di onderstand, y pa esnan cu toch no por paga, gobierno tin cu busca un solucion. “Pero e solucion no por ta dump ilegal. Cu mester di solucion? SI! Con nos ta bay dreche? Esey nos mester bay haci pregunta mas leu, na gobierno, na Serlimar, ken ta bay hacie”, Parlamentario Heyliger a reitera.
El a sigui splica cu ceramento di dump a trece su consecuencianan cu ne, nos ta mira cu Aruba ta susha hopi mas lige cu anteriormente. “E ta un mentalidad, pero tambe mester duna e hendenan espacio pa haci nan cura limpi, pone sushi afo y no preocupa cu e sushi ta keda atras. Anto, kico nan ta haci? Nan ta tuma e chens pa bay tira e sushi na otro caminda; loke no ta corecto, pero esey ta pasa. Hendenan cu ta tira sushi otro caminda mester boet nan. Nos tin cu busca solucionnan pa esnan cu no tin recurso, esey mester por. Pa esnan cu no por, mi ta bay trece dilanti e minister, pero en general mi ta kere mayoria di hende mester por contribui, pasobra nos kier un isla limpi”, Parlamentario Heyliger a señala.
