Segun Parlamentario Evelyn Wever-Croes:
“Transparencia den gobernacion no ta un fabor, e ta un obligacion”
ORANJESTAD (AAN): Segun Parlamentario di Fraccion di MEP Evelyn Wever-Croes, varios ciudadano ta puntra tocante e caso di jet priva di Minister Gerlien Croes y kico lo pasa cu e caso aki, y principalmente, kico ta e siguiente paso cu Fraccion di MEP por tuma den e caso aki.
Despues cu na december aña pasa, Minister Gerlien Croes a nenga di contesta preguntanan cu e Fraccion a haci na su persona, y tambe e contesta di e minister na februari di e aña aki informando e fraccion den oposicion cu e lo no contesta, Fraccion di MEP a acudi na Bezwaar Adviescommisie LAR, cu ta e instituto caminda cu por apela un decision di Gobierno, y a cuminsa un proceso di apelacion.
Parlamentario Wever-Croes a remarca cu ya ta casi dos siman a pasa desde cu LAR a manda su conseho na Minister Gerlien Croes. Fraccion di MEP a manda e minister un carta den cual nan ta pidi minister pa publica e conseho.
E minister tin seis siman pa tuma un decision basa riba e conseho di Bezwaar Adviescommisie LAR. E Parlamentario di MEP a remarca cu den caso e conseho ta bisa cu e minister no mester contesta, e minister ta tuma un decision dentro di seis siman si e ta contesta of no. E ora Fraccion di MEP lo apela na corte.
Si e conseho ta indica cu e minister mester contesta, cual segun e parlamentario, esey lo ta e caso pasobra lo no tin manera cu lo conseha pa no contesta, e ora e minister mester contesta e parlamentarionan di MEP na ken el a paga, cuanto el a paga, y ki dia el a paga pa e jet priva. Den e caso aki, segun Wever-Croes, e minister tin seis siman pa pensa kico e ta bay haci, si e ta contesta of no.
Segun Wever-Croes, si e minister contesta e fraccion, mandando tur e documentonan cu nan a pidi, e ora e caso ta caba ey, pasobra segun e, tin claridad. Pero, si e minister no contesta of no contesta completo despues di seis siman, e ora Fraccion di MEP lo bay corte di prome instancia.
El a mensiona cu Minister Gerlien Croes mester realisa cu Transparencia den gobernacion no ta un fabor, e ta un obligacion. E ta conseha Minister Gerlien Croes pa sea transparente y mustra kico e ta bay haci.
El a agrega cu e caso aki ta den man di Ministerio Publico, di Bureau Integriteit Aruba, di Bezwaar Adviescommisie LAR, y pronto lo ta den man di corte tambe. “E caso no a caba, y lo no caba tampoco te dia cu Minister Gerlien Croes papia e berdad”, Parlamentario Wever-Croes a enfatisa.
