Parlamentario Jennifer Reyes-Arends, fraccion AVP:
ORANJESTAD (AAN)-- Parlamentario Jennifer Reyes-Arends, di fraccion di AVP, den entrevista cu Matutino DIARIO a elabora tambe, riba e tema di e reunion cu Parlamento tabata tin, recientemente, cu CMO (Oficina Maneho di Crisis).
“Locual nos a haci awe ta un encuentro cu CMO, cu ta bin eigenlijk di e Senioren Convent, unda cu nos ta sinta cu e lidernan di fraccion, locual nos ta haya hopi biaha den e parti strategico tambe den region, locual ta pasando y con prepara nos ta como isla”, e Parlamentario a indica.
Reyes-Arends a señala cu den e setting aki nan a pidi tambe pa diferente miembronan di e fraccionnan tambe por tuma nota di e plannan cu tin, di parti di CMO, con prepara nan ta aunke nan tin cluster arbeid di cyber security, y ta hopi importante pa Aruba tambe kico falta.
“Pasobra con CMO a desaroya su mes durante transcurso di añanan, tambe ta importante pa nos remarca como isla, con nos a prepara y con nos ta bay sigui desaroya nos mes”, Jennifer a señala.
El a indica cu esaki ta keda importante [pa Aruba como un isla dependiente di turismo. “Y ta hopi importante pa nos como Legislador tambe por sa unda ta e puntonan tambe cu nos por sigui puntra, y tambe pidi atencion urgente pa locual ta situacionnan cu por pasa na Aruba”, Jennifer Reyes-Arends a menciona.
El a remarca cu esaki ta un responsabilidad colectivo, unda tur e departamentonan concerni y tambe e pueblo di Aruba wak kico ta nan rol.
“Loke a bin dilanti den e reunion a pone nos realiza cu tur ciudadano na Aruba tambe tin un compromiso cu e isla, caminda cu nan tambe tin cu wak pa nan famia ta proteha lo miho posibel, y tur caminda cu nos ta core riesgo, unda cu nos tin cu ta prepara pa tin nos awa, etc., poco, poco pa yega na e momento cu algo por presenta, caminda cu tin riesgo, y ora nos ta haya situacionnan na unda tur locual cu tin pa henter e isla ta wordo caba den tempo cortico, locual cu nos ta wak den e otro Islanan”, e Parlamentario a subraya.
