Parlamentario di Fraccion di AVP, John Hart
ORANJESTAD (AAN) – Parlamentario di Fraccion di AVP, John Hart, a enfatisa cu e situacion dentro di cuerpo policial mester keda un prioridad riba agenda di Parlamento. Segun Hart, lo percura pa Minister di Husticia, Arthur Dowers, presenta regularmente den reunionnan parlamentario pa brinda actualisacion y informacion tocante e desaroyonan den e sector.
Hart a destaca cu Minister Dowers ta un di e ministernan di e gobierno actual cu mas frecuentemente a presenta den Parlamento ora cu a wordo convoca. Entre otro, e minister a participa den varios debate y tratamento di caso importante cu a surgi den e ultimo dos aña. Segun e parlamentario, esaki ta precisamente con un democracia saludabel mester funciona: cu transparencia, cla pa rindi di cuenta y dispuesto pa discuti topiconan compleho y sensitivo.
El a agrega cu tanto Minister Dowers como, posiblemente, Alto Comisario Arnhem lo presenta den Parlamento proximamente pa informa pueblo y Parlamento tocante e maneho di KPA y e desafionan cu actualmente ta enfrentando.
Ademas, Hart ta di opinion cu lo ta beneficioso pa Comision di Husticia invita señor Lito Lacle y representante di Sindicato SPA pa un reunion, of inclusive un reunion publico den Parlamento, pa asina logra claridad riba e situacion actual y contribui na identifica solucionnan concreto mas pronto posibel.
