Otmar Oduber (PPA):
*Ta ora pa bin cu alternativa real pa salario minimo”
ORANJESTAD (AAN): Diamars den Parlamento tabatin e Reunion Publico pa trata e ley di aumenta salario minimo y salario pa ora, di cual fraccion di PPA ta na fabor. Sinembargo, parlamentario Otmar Oduber, como unico representante di PPA, a indica cu ta yega momento si pa atende cu e tema aki cu seriedad, paso e consecuencia cada aumento, ta pueblo ta paga p’e.
Igualdad no desea
Segun Otmar Oduber: “Niun comerciante ta bay absorbe e salario minimo. Nos a reuni cu nan y nan a indica cu gobierno por haci kico e kier cu e salario minimo. Nan lo sigui bereken door y pueblo ta bay paga”. Mas cu claro, e situacion aki no ta yuda pa crea e igualdad cu ta desea den comunidad, cu e topico di salario. “Kico nos ta bay haci, ora cu un supervisor su salario ta mescos cu un cu ta gana salario minimo y cu ta cay bou di dje? Paso si bo forsa un empresa cu hisa salario minimo, unda actualmente nos ta yegando casi 2 mil florin, e supervisor cu ta ganando rond di 2 mil florin, tambe mester haya aumento e ora?.
Alternativa Beneficio Economico Laboral (BEL)
Oduber a splica tocante un alternativa cu PPA tin ya caba den su programa di partido. Un alternativa, cu ora Oduber a presenta na e gremionan comercial, varios a bay di acuerdo cu ne, paso no por sigui aumenta salario minimo, incluso Camara di Comercio. E meta di Beneficio Economico Laboral (BEL) ta pa netamente aumenta productividad laboral den sector priva, unda lo inclui den e reforma fiscal e areglo di BEL. “BEL ta bay den direccion pa cuminsa hala for di salario minimo. Fraccion di PPA ta consisti di 1 persona so y esey ta hacie dificil, pero ohala nos por hacie hunto, caminda bo ta crea e beneficio, ora un empresa ta bay bon, ta comparti cu esunnan cu ta traha pa e compania ey. Bo ta duna nan un entrada cu no ta mara na e salario minimo, pero como un toeslag cu nan ta haya den nan salario, sin cu e ta conta pa loonbelasting of e otro premienan cu tin”.
Practica di BEL ya ta tumando lugar
“Mi ta papia di dje y awe mainta mi ta habri corant y mi ta wak un departamento sumamente exitoso, cu ta cay bou di Minister Cicilia, esta ANSA, ta firma un CAO nobo. Algo cu sigur mi ta sumamente orguyoso di e departamento aki, cu ta existi ya pa 11 aña. Anto e base di e CAO mas importante cu nan a cera awor ta, cu e trahador ta bay haya beneficio di con bon e compania ta cana. Pues segun e compania ta bay bon, e trahador ta haya un porcentahe den su salario.
Exactamente e espirito di e ley BEL, cu nos di PPA a presenta”, Oduber a subraya.
Finalmente parlamentario Oduber a haci algun pregunta na minister en cuestion. Uno ta, cu si tin un estudio haci di e ‘rimpeleffect’ riba henter e sistema salarial di e compania? Di dos ta, cu si tin un estudio haci riba e efecto di posicion di cada trahador den e empresa. Y di tres tabata con e efecto aki a transforma y ta hinca den e prijsnan. Otmar a termina felicitando Parlamento pa sostene e ley aki como tambe na esunnan cu a traha riba e ley aki for di 2018. Ta yega ora pa nos trek recht y pa cuminsa pensa riba alternativa, pa sigui evita pa aumenta salario minimo.
