Marco Berlis (MEP):
ORANJESTAD (AAN): Pa decadanan Aruba su turismo tabata florece positivamente, sinembargo e situacion di e planta di purificacion di awa na Bubali Plas (RWZI) no a “crece” hunto cu nos turismo.
E planta di Bubali Plas ta data di 1972 y a conoce poco inversion bao di gobiernonan anterior, y apenas 1 miyon florin bao mando di AVP. AVP a ricibi rapportnan di Bos & Witteveen cu a duna di conoce bon cla cu e plantanan tabata tin mester di un inversion miyonario, sinembargo ni den e tempo di bonansa di 2009-2017 a inverti, y e tempo ey un planta nobo lo a costa pais Aruba “apenas” 60 miyon florin.
Consecuencianan y preocupacionnan publico
Entre 2021 y 2023, e situacion a empeora significativamente. E holornan desagradabel di e planta a afecta tanto e calidad di bida di residentenan como e experiencia di turistanan. E planta no tabata capaz di procesa e volumen creciente di awa sushi proveniente di e hotelnan.
Comunidad, medionan di comunicacion y rednan social a pone presion riba gobierno pa soluciona e situacion alarmante. Gabinete Wever-Croes, a pesar di e desafionan di pandemia y fondonan limita, a inverti miyones pa mantene e planta funcional, pero un solucion structural tabata necesario.
CAft a menasa Gobierno cu KB pasobra a presupuesta placa pa RWZI
Na 2022, reconociendo e crisis ambiental y e menasa pa e industria turistico, Gabinete Wever-Croes II a inclui 16 miyon florin den e presupuesto pa crea un fondo pa un planta nobo. Sinembargo, CAft (College Aruba financieel toezicht) a obheta fuertemente contra di e asignacion aki, y a hasta menasa gobierno cu un Koninklijk Besluit (KB) si e fondo aki keda den e presupuesto. Esaki a limita e opcionnan di gobierno pa financia e proyecto directamente.
Gobierno su solucion a wordo aproba pa Parlamento
Pesey gabinete Wever-Croes a traha un ley pa bin cu un entidad nobo cu a wordo yama AWSS. E entidad aki tin tres tarea primordial;
- Construi un planta nobo pa Bubali Plas, cu capacidad 4 biaha mas grandi cu esun actual
- Renoba e plantanan di RWZI na Zeewijk y Parkietenbos
- Mehora e sistema di riolering na Aruba.
- E plan: turistanan ta paga $20 na entrada di Aruba y e placa aki lo bira collateral pa busca financiamento internacional pa cumpra e planta nobo.
- Na Januari 2024 gobierno anterior a bin Parlamento di Aruba cu e ley pa legalisa AWSS y esaki a pasa exitosamente. Na Juli 2024 e ley a bay na vigor y awor ta buscando e financiamento pa por cuminsa e construccion di e planta.
Puntonan clave tocante di AWSS
Pa evita confusion, e articulo ta clarifica varios punto importante:
- AWSS ta un entidad privatisa similar na Elmar, Setar y Web Aruba NV.
- AWSS “no a haci ningun prestamo ainda!” Awor ta negociando cu banconan.
- Cu e prestamo ta caro segun CAft, ta algo cu e compania ta responsabel p’e. Esaki ta mescos ora WEB Aruba NV ta haci un prestamo pa un “motor” of proyecto nobo; WEB mester pague, no gobierno!
- AWSS lo upgrade y lo construi un planta nobo, inversion total 200 miyon florin.
- AWSS lo provee purificacion di awa na standard di nivel internacional y lo elimina e mal holo y contaminacion di awa.
- AWSS su entrada ta bin di e $20 di turismo via aeropuerto.
Pakico anto tin tanto noticianan “fake?” Politiconan di coalicion actual no kier bo wak e chaos den gobierno; e situacion di Mike de Meza y un gobierno incompleto, e situacion di rijkswet nobo cu Mike Eman y Gerlien a tarda pa firma, cu ta costando pueblo awo 1.4 miyon florin extra pa luna pa via di nan negligencia, e situacion di medida y aumento di gas di 30%, cortamento den enseñansa 2.9 miyon, salubridad 1.5 miyon, Husticia y Asuntonan Social 6.2 miyon, promesa di Fondo di inversion di Hulanda ta den prullebak, gobierno actual a duna solamente 50% di remedinan bek na pensionado, costo di bida ta sigui subi, control di DPL elimina, asina e stranhero ta haya trabao prome cu e yiu di tera, y a regala Schiphol Groep 6 miyon florin. Keda pendiente pa mas informacion corecto y al caso.
