Cambio pa un salario minimo pa ora ta crucial y necesario

Parlamentario Shailiny Tromp-Lee:

ORANJESTAD (AAN): Un cambio pa un salario minimo pa ora ta crucial y necesario. Como parlamentario cu a traha personalmente riba e tema aki, Shailiny Tromp-Lee ta convenci cu esaki no ta djis un adaptacion administrativo, pero un paso grandi pa un mercado laboral mas husto y transparente pa tur trahado na Aruba. 

Ta bon pa mi splica dicon e cambio aki tabata y ta asina urgente y importante?

Ley actual di salario minimo, cu ta data for di 1972, ta un ley bieu cu no ta pas mas cu e realidad dinamico di nos forsa laboral. E ley aki ta basa riba un salario minimo mensual, cu ta crea un situacion desigual y inhusto. Ta bon pa pueblo realisa cu na Aruba e salario minimo di Awg. 1.986,20 pa luna no ta tene cuenta cu e cantidad di ora cu bo ta traha. Si bo ta traha 40, 42, 44 of 45 ora pa siman, na e momento aki na Aruba bo ta gana e mesun salario minimo. Si bo ta trahando 40 ora pa siman actualmente bo ta gana 11,58 florin pa ora, si bo ta traha 44 ora pa siman ta 10,53 florin pa ora y si bo ta traha 45 ora pa siman bo ta gana 10,29 florin pa ora. Mas cu claro esaki ta trece un situacion inhusto y sigur ta un discrepancia cu no por continua.

-Kico ta e meta di e ley?

E ley aki ta trece husticia y un trato igual. Door di introduci un salario minimo pa ora, nos ta sigura cu cada ora traha ta wordo compensa na un manera husto y igual pa tur trahado, sin importa e sector of nan orario di trabou. Esaki ta duna nos trahadonan e seguridad di un salario husto. Ademas, un salario minimo pa ora ta crea mas transparencia y un miho control. Tanto trahadonan como dunadonan di trabou por compronde y controla nan pagonan mas facil. Esaki ta reduci e riesgo di exploitacion y pago desigual, y ta facilita e trabou di esnan encarga cu e control.

 -Ki ta e impacto pa e clase trahado?

Ta bon pa pueblo sa ki e cambio di e ley di salario minimo ta bay implica pa nan. Mi kier informa cu e cambio ta bay conduci cu bo salario minimo lo bira pa luna segun e cantidad di ora cu bo ta traha: e salario minimo actual ta Awg. 1.986,20. Door cu den e calculacion bieu tabatin un fout den e factor di calculacion di e salario pa luna, ta corigi esaki tambe mediante e cambio di ley cu nos ta tratando. Esey ta conduci cu esnan cu ta traha 40 ora pa siman tambe ta bay conoce un aumento chikito. Den e tabel aki bou mi ta presenta e impacto a e clase trahado: 

Cu e cambio aki sigur nos ta dal un paso mas pa modernisa y cambia nos leynan laboral. E cambionan ta percura pa nos dal un stap mas grandi pa crea un sociedad mas husto y alinea cu e esfuersonan global di SDG #8 cu ta para pa trabou digno y crecemento economico. Como pais nos mester sigui promove y traha riba entre otro crecemento economico sostenibel, inclusivo y duradero y trabou digno pa tur hende.

Alabes introduccion di un salario minimo pa ora ta sluit aan na e principionan di ILO cu ta para pa proteccion di trahado. ILO ta boga pa un sistema di salario minimo cu ta proteha e trahadonan mas vulnerabel. E cambio pa un salario minimo pa ora ta trece mas transparencia y ta haci e calculo di salario mas facil, garantisando asina cu trahado ta wordo paga pa e oranan cu e ta traha.

Mediante e cambio di ley aki, nos ta dal un stap grandi pa logra un futuro caminda nos hendenan por gosa di un bida digno, trabou y pago husto, y di mehoracion di nan poder di compra. E cambio di ley aki lo beneficia directamente alrededor di 6.600 persona aki na Aruba y di e grupo aki alrededor di 4.900 persona lo bay conoce un adelanto substancial di nan entrada pa aña. Y pa finalisa cu mi kier menciona cu gran parti di e grupo aki ta nos hende muhenan.