Fraccion MEP na sr. Goeloe di Futuro:
ORANJESTAD (AAN): Partido MEP a keda sorprendi, y ta haya lamentabel cu señor Goeloe ta sali papia un bes mas riba e "cuentanan anual” sin cu e mes a haci su trabao y haci pregunta al respecto.
Riba Diahuebs, Parlamento a ricibi un splicacion amplio di director di Departamento di Finanzas y sr. Goeloe mes no tabata presente.
Director di Departmento di Finanzas a splica cu e "cuentanan anual" te cu 2023 ya ta entrega na Algemene Rekenkamer (ARA). Y esaki no ta danki na ningun rijkswet, sino danki na esfuersonan y inversionnan cu a ser haci den nos departamentonan y hendenan.
Pa MEP ta 100% bisto cu Goeloe no a pone atencion den ningun reunion cu ARA den parlamento. Bisto tambe, cu e no tabata presente den e reunion cu Departamento di Finanzas, unda cu claramente a splica e situacion di e jaarrekeningnan, pero tambe con dificil e ta pa haya ‘auditors’. Y pesey asta a cuminsa sondea alternativa pa soluciona e reto aki.
E punto ta cu CAD no tin hende, pa compania di afo hacie pa bo, ta costa hopi placa, y e specialidad aki ta dificil pa gobierno haya. E punto cu Goeloe ta remarca akinan ta netamente su actitud den parlamento te cu awor, beter lui, dan moe. Pasobra en bes di keda warda riba un cuenta anual di audit, e tin di ta proactivo y cuminsa prome, pa haci pregunta, controla su gobierno e.o. riba e malgastamento di placa ad hoc di Ban back Caya.
Realidad ta cu desde sr. Goeloe a bira miembro di Parlamento, e no a haci ningun pregunta na Gobierno. Tur hende ta mira tambe con e ta pega soño constantemente den sala di Parlamento.
Sr. Goeloe su falta di seriedad no ta wordo cualifica como "clown", manera el a yama Parlamentarionan di oposicion. Mas bien sr. Goeloe ta wordo cualifica como un persona totalmente incompetente y sin interes den defende interes di Aruba.
Pueblo tin derecho riba un representacion serio, no na un representante cu ta uza palabra grandi pero no ta cumpli cu su deber.
