Parlamentario Shailiny Tromp-Lee:
ORANJESTAD (AAN): Banda di cu e gobierno di Aruba a faya cu Parlamento di Aruba y e pueblo di Aruba, e gobierno di Hulanda tambe a faya pa cana segun reglanan cu nan mes ta exigi tur ora di e islanan. Na momento cu gobierno di Aruba a bin pa entrega e Rijkswet sin consensus, Rijksministerraad mester a puntra e gobierno si el a consulta cu su parlamento.
Rijksministerraad mester a puntra gobierno di AVP –Futuro si el a consulta cu su parlamento y si el a ricibi e consensus di su parlamento, si nan tin un mocion pa mustra cu e gobierno a haya e instruccion specificamente of si tin un carta oficial di parlamento cu berdaderamente gobierno di Aruba AVP –Futuro a haya e consensus aki di parlamento di Aruba. Berdad ta cu di tur dos banda no a cana e caminda corecto.
Durante e reunionnan di IPKO, e presidente di parlamento di Aruba, sr. Marlon Sneek a keda puntra pa ki dia e reunion pa trata e consensus rijkswet HOFA lo bay keda yama. Presidente di parlamento sr. Marlon Sneek a indica cu asina cu e delegacion yega Aruba back lo manda yama e reunion e siman siguiente.
Sinembargo nos realidad ta cu mirando cu e Rijkswet a keda entrega caba na Rijksministerraad e unico sentido di e reunion ta si nos como Parlamento no duna nos consensus y para e proceso.
E realidad ta cu Gobierno di Aruba a pasa riba cabes di parlamento di Aruba. Lamentablemente presidente di parlamento di Aruba enbes di a para pa parlamento y democracia parlamentario, no a exigi respet pa Parlamento di parti di gobierno di Aruba. Opinion di nos Fraccion a keda ripiti pa Raad van State durante di nan presentacion durante di IPKO y tambe den nan contestacion na Parlamentarionan. Tambe AVP por a constata cu mayoria colega parlamentario ta sostene e decisionnan di IPKO dia aña 2022 caminda a keda dicidi cu Parlamentonan mester ta informa, envolucra y a duna consensus na tur momento. Lo ta incomprendibel si nan kier sigui hustifica e falta di respet aki unabes nos ta na cas back.
Ki tipo di reunion ta na caminda: Den e reunion na caminda parlamento di Aruba no por uza instrumento parlamentario mas pa por trece cambio den e Rijkswet HOFA. Segun parlamentario Shailiny Tromp Lee, Parlamento di Aruba por bisa cu Gobierno lo mester trek e Rijkswet back y indica na Gobierno pa cuminsa cu e proceso di nobo.
Asina ta brinda Parlamento berdaderamente e oportunidad pa trata e Rijkswet, pa por presenta mocion si ta necesario, pa indica na Gobierno pa bay explora otro tipo di samenwerking cu Hualnda y of por duna consensus si of no.
Actualmente manera e Rijkswet ta Fraccion di MEP no por qoroba e concept Rijkswet debi cu e tin hopi puntonan cu ta di duna nos hopi preocupacion, principalmente e exit bepaling, normanan cu ta hinca den e ley, e trato desigual cu nos rumanan den Reino y ta antidemocratico.
Un otro punto hopi crucial ta cu nos ta bay drenta den un consensus Rijkswet supervision financiero mientras claramente e gobernantenan di Curaçao y St Maarten a y ta keda indica cu e Rijkswet no a beneficia nan Pais. No ta trata solamente cu e normanan no a traha na nan beneficio pero tambe a tranca nan desaroyo economico y social. Rapport di evaluacion ta indica mescos.
Awo enbes cu Aruba ta mas consciente y tene cuenta cu esaki y cuestiona pakico Aruba mester bay cay bou di mesun tipo di ley, nos a bay di acuerdo cu un rijkswet cu ta mas rigido cu esun di noa rumannan isla.
Tambe si realmente e gobierno di AVP –Futuro ta convenci cu e Rijkswet riba mesa ta e miho producto cu tin pa Aruba, di con e gobierno di AVP-Futuro no a bin parlamento cu ne, si e ta algo bon pa Aruba no tin nada di sconde. Di con Minister Geoffrey Wever, Minister Gerlien Croes y prome minister Mike Eman no a bin parlamento pa haya sosten di nan propio parlamentarionan? Pa asina cumpli cu e democracia parlamentario.
Parlamentario Shailiny Tromp Lee ta kere fuertemente cu e motibo cu no a bin parlamento ta debi cu AVP desde di un principio no tabata di acuerdo cu e Rijkswet, nan tambe como un partido grandi ta para pa autonomia di Aruba, nan tambe a para contra e proceso encamina cu COHO cu awe a bira un onderlingeregeling. Pero sin embargo aunke cu AVP ta para pa tur e puntonan aki cu MEP ta para pe, AVP no ta scoge pa para pa Aruba , pero ta scohe pa coalicion tin trankilidad, nan ta accepta e caminda di entreguismo cu Futuro ta boga pe.
Lamentablemente AVP no ta para pa bienestar di Aruba, pero ta prefera di para pa bienestar di partido y bienestar di coalicion y pa ta den gobierno, riba bienestar general di Pais Aruba cu ta bienestar di Aruba. Ta kies pa no para pa Aruba su autonomia y su status aparte.
