Fiscal Zamira Paesch di OM:
ORANJESTAD (AAN): Fiscal Zamira Paesch, a reitera cu Ministerio Publico a bin cu cambio riba e sistema di boet for di aña 2023, y polis ta subi caya cu e papel aki conoci como OPV, imprimi, pa ora ta constata infraccion den trafico.
Na momento cu polis constata e boet, e ta yena e documento hunto cu e persona den auto, y nan ta skirbi e nomber, cu auto e ta coriendo, number di auto, fecha cu a constata e infraccion, y e tin cu marca tur locual e ta wak, traha su processverbaal, y e ta marca tambe e dia cu e persona tin cu presenta na Corte.
E persona cu a comete un infraccion den trafico, ta haya un copia. E papel aki ta wordo imprimi den tres diferente color: blanco, cu ta bay pa Hues, berde cu ta keda na Ministerio Publico, pa e Fiscal cu ta bay atende cu e caso den Corte, y e persona cu a comete e infraccion aki ta haya e color geel.
E papel aki tin un number unico tambe cu bo por ariba “OPV number” y esey ta mara na e boet cu e persona a haya y tambe na ki suma e tin cu paga.
Fiscal Paesch a splica cu leynan di trafico ta hopi amplio, y na momento cu nan a diseña e documento aki, nan a kies e infraccion di mas comun: core sin rijbewijs, core sin safety belt bisti, etc. Y sigur, ora cu polis duna e boet, naturalmente ta duna e copia tambe na e persona concerni.
Esey no kiermen cu polis no por aplica otro leynan di trafico cu no ta riba e OPV aki. Por ehemplo, si bo ta coriendo hopi duro y pone trafico na peliger (articulo 2 di ley di trafico), no ta riba e OPV aki, pasobra polis lo mester bay elabora mas kico ta e acto cu e persona a haci pa pone e trafico na peliger.
“Esey no ta nifica cu bo ta haya e boet segun e sistema bieu cu e boet ta yega bo cas, despues. Pero e OPV aki ta pa mehora e control di trafico, cu e leynan pa infraccionnan mas comun”, Fiscal Paesch a reitera.
