ORANJESTAD (AAN) Señora Liliana Rasmijn, Vocero di Cuerpo Policial, a duna informacion tocante e manera con lo cera e rutanan,
segun e parada ta pasa, durante e despedida postumo di e artista y icono cultural di Aruba, Robert Jeand’or.
Rasmijn a duna di conoce cu Dialuna mainta nan tabatin un reunion na SMAC pa loke ta Diabierna y Diasabra, y despues di esey nan a sinta apart cu miembronan di DOW, na unda nan a yega na un acuerdo pa, vooral, tur esnan cu tin scolnan rond tene cuenta cu e caminda ta bay wordo cera . “E ta cuminza desde 2’or pa 2.30 or, nan ta bay cera e caminda; esaki ta for di Stadion mescos cu ora ta ruta di carnaval, pida, pida DOW ta cuminza pone su material pa cera caminda, unda cu nos ta pone nan prepara, nos ta bay tin na rotonde di Banco di Caribe un bromer na unda manera cu e parada ta biniendo e drenta bay pa Vondellaan e caminda eynan ta wordo cera”, Vocero di KPA a splica.
El a agrega cu tur otro caminda por bay menos drenta na Vondellaan y segun cu e parada ta sigui bay nan ta yega na e cruzada di George Madurostraat, esey tambe ta bay wordo cera, pero segun cu e parada ta yegando, y mester tene bon cuenta na esaki.
Liliana Rasmijn a duna di conoce cu conhuntamente cu DOW, KPA ta bay publica esaki, p’asina tur hende ta na haltura ki ora, exactamente, e ruta wordo cera, na unda ta wordo cera, y cual ta e desviacionnan. Pa esnan cu kier bin tin suficiente lugar di para. “Mi a compronde for di e presidente di SMAC cu lo tin e ruta di e parada pa loke ta Diasabra, y tambe ora e keda cla nos lo publik’e tambe, pa esnan cu kizas kier para banda di caminda y di e forma ey dispidi di Robert, nan por haci’e cu mil amor, pasobra nos lo coopera mas tanto cu por. Segun dia ta pasa nos lo informa riba nos pagina tambe”, Vocero di KPA, Liliana Rasmijn a relata, indicando tambe pa no blokea otro pero duna tur hende chens pa para dispidi di Robert.
