Vocero di Cuerpo Policial, Liliana Rasmijn:
ORANJESTAD (AAN): Ta falta solamente dos fin di siman pa Aruba bisa ayo na Carnaval 72. Cuerpo Policial di Aruba lo ta presente activamente durante e paradanan benidero, garantisando siguridad y control den e eventonan mas grandi di nos isla.
Vocero di Cuerpo Policial, Liliana Rasmijn, a informa cu polis ta prepara intensivamente pa tur situacion cu por presenta durante e fin di siman druk aki di Carnaval.
Actualmente, Cuerpo Policial ta wardando for di Smac e cantidad di grupo y participante cu lo ta den e ultimo paradanan di Carnaval. A base di esaki, lo wordo asigna e cantidad necesario di polis pa mantene orden y siguridad durante e eventonan.
Señora Rasmijn a enfatisa cu e aña aki tin menos detencion registra durante e paradanan, compara cu aña pasa. Segun e, esaki ta un señal hopi positivo y un indicacion cu mas hende ta actuando cu responsabilidad.
Un punto importante cu el a destaca ta e consumo di alcohol. Aunque consumo ta keda presente durante celebracionnan, a nota cu mas persona ta opta pa uza un “amigo responsabel” pa stuur. Esaki ta esencial pa mantene siguridad den trafico y preveni accidente. “No bebe y stuur” ta un campaña cu varios organizacion ta impulsando durante e temporada aki, y Cuerpo Policial ta sigui sostene e mensahe aki cu firmesa.
El a agrega cu cualkier persona cu wordo deteni pa stuur bou di influencia di alcohol por enfrenta consecuencianan serio: detencion, posibilidad di perde rijbewijs y boet.
Cuerpo Policial di Aruba ta sigui promove conscientizacion y responsabilidad den trafico, cue meta di preveni cualkier incidente y asina logra un final di Carnaval safe pa tur ciudadano y bishitante.
