Desde 11 di Maart no a mira e mucha muhe di 14 aña mas
ORANJESTAD (AAN): Riba Social Media, desde siman pasa caba ta circula e suplica di famia, pa kende cu ta cu tin informacion cu sa paradero di e mucha muhe Casey Trimon, pa nan bin dilanti y informa nan di esaki.
Esaki a bin despues cu Casey no a wordo mira mas desde Diamars 11 di Maart 2025. Famianan a core pidi pa su buskeda, y nan a skirbi cu di prome instante caba tambe a notifica Polis.
Sinembargo te Diamars merdia, Cuerpo Policial Aruba a emiti boletin cu ta buscando paradero di e mucha muhe aki.
El a wordo identifica como Casey Daniela Trimon Orjuela, kende tin 14 aña di edad. E ta un mucha muhe di estatura di como 1.54 meter, e tin cabey color cora scur. No tin ningun informacion ki tipo di paña y zapato e tabatin bisti e Diamars ey cu el a desaparece.
Personanan cu por sa di algo, por yama e famia na 745-7396 pa notifica nan, como cu nan ta tur angustia y desespera pa haya nan yiu muhe.
Cuerpo Policial tambe ta adverti cualkier persona(nan) cu lo por tin e mucha muhe aki scondi den nan cas, cu loke nan ta haciendo aki tambe ta castigabel pa ley na Aruba.
Polis ta pidi esnan cu tin informacion pa yama Central di Polis mesora na 100 y duna detaye di esaki.
ULTIMO ORA: Diamars atardi laat a drenta informacion di Polis, cu e mucha muhe a wordo haya y ta bek cerca famia. No a divulga si e mes a bay di cas, of si acaso el a wordo teni como rehen, of kico otro lo por a socede.
