Liliana Rasmijn, Vocero di KPA ta informa:
ORANJESTAD (AAN) Liliana Rasmijn, Relacionista Publico di Cuerpo Policial, den entrevista cu Matutino DIARIO a elabora riba e cambionan cu for di 1 januari 2026, ta wordo implementa pa loke ta trata pasamento di rijbewijs.
Rasmijn a confirma cu aworaki ta pidi tur Rijschool pa nan mes bin cu e auto, of cu e persona cu ta bay pasa e rijbewijs, pa loke ta e parti practico, e mes ta bin cu auto.
Pero e auto mester cumpli cu tur e rekisitonan. Kiermen, e mester tin aseguro valido, mester ta gekeurd, number di auto mester ta paga, y el a compronde for di e hefe di Departamento di Rijbewijs cu e auto no mag ta getint dilanti. A manda email y tur Rijschool ta na haltura.
Rasmijn a comenta cu tur e autonan aki a bin den temporada di Covid-19. “E tempo ey tur cos a para pa basta luna, despues tiki-tiki nos a cuminza bay den normalidad pero tabata tin hopi exigencia, y na unda pa e salud di esnan cu ta bay pasa e rijbewijs, pero tambe pa e instructor, door di beskem den auto, mester a busca e autonan cu tin awo, pero nan lease a caba tambe” Rasmijn a señala.
Liliana Rasmijn a agrega cu mirando cu nan lease a caba, y no a extende esaki, Departamento di Rijbewijs a bay over tur Rijschool y alavez den e mesun email, a avisa nan cu pa 1 di januari 2026 cada auto cu nan uza mester cumpli cu loke ley ta rekeri. “Kiermen nan a wordo avisa caba cu suficiente tempo, y den December nos ta bay saca un recordatorio un biaha mas, p’asina tur hende sa cu pa 1 januari 2026 bo auto mester ta apto pa loke ta pasamento di rijbewijs”, Vocero di KPA, Liliana Rasmijn a subraya.
