Caso di Diahuebs na Beach di Arashi
ORANJESTAD (AAN): Autoridad policial di Aruba a haya cu merece haci mencion di e trabao balente cu un agente policial a haci riba Diahuebs atardi durante di e emergencia na Beach di Arashi, unda un dama hulandes a perde su bida den lama, y un otro dama hulandes a keda hospitaliza.
Tabata Diahuebs algo despues di 6:00 pm, cu Central di Polis ta worde notifica cu tin turistanan cu problema den lama na Arashi. Di biaha a despacha Unidad di Polis como tambe ambulance na e lugar di e sucedido.
Na yegada di e prome Unidad di Polis, e agente policial a observa cu tin un grupo den lama ta hisando man y ta gritando pa yudansa. Sin duda agente policial a bay di biaha den accion y a drenta lama pa por bay brinda yudansa na e victima cu tabata tin mester di Polis.
Prome Rescate: Ta trata di un grupo di turista nacionalidad hulandes. E turistanan aki a bay goza di solo y lama y tabata snorkel y na dado momento un di nan a bira malo y no tabata reacciona mas, pues casi no ta halando rosea. Ta trata di un señora hulandes. E agente encuestion ta cuminsa na trece e señora canto y na mitar caminda ta topa cu un rubberboot di un compania local y nan na nan turno ta yuda pone e victima den e boto hunto cu e Polis pa trece canto.
E agente a keda duna e victima e prome auxilio door di practica CPR riba dje, te ora nan a yega tera pa e prome unidad di ambulance presenta y a sigui cu e re-animacion.
Di Dos Rescate: Un rato despues nan a avisa Polis cu tin un otro persona den lama cu tambe tin problema den lama y tampoco no ta reaccionando. E señora aki tambe lo ta hunto cu e famia di e victima cu a worde hiba canto. Un biaha mas esnan riba e rubberboot ta duna un man y ta yuda na busca y trece e otro señora.
A pidi pa mas unidad di ambulance pa presenta y pa duna re-animacion pa e di dos victima. Despues di trabao duro ta bin logra haya pulso y asina stabilisa e di dos victima y transporte cu maximo urgencia pa Servicio di Emergencia na Hospital.
Lamentablemente no por a haci nada mas pa e prome victima. Docter Forensico a presenta na Arashi y a constata morto di e señora di 53 aña naci na hulanda. Cuerpo Policial ta manda palabra di condolencia na famia di e fayecido.
Na Arashi tambe a presenta personal di Bureau Slachtofferhulp pa brinda guia y yudansa na famia di e fayecido como tambe e otro victima. Loke nos di Cuerpo Policial a haya como ultimo informe ta cu e señora ta den cuido intensivo.
Cuerpo policial ta gradici y ta orguyoso di e agente polis cu a sa di bay un extra mile pa por a yuda dos victima. Su curashi y balentia ta trece cune cu nos di Cuerpo Policial Aruba ta agradecido. DIARIO a compronde cu ta trata aki di agente policial di inicial W.
Esaki ta un di e tareanan cu KPA ta haci lo maximo esfuerso di guia nos agentenan pa brinda e mihor servicio tanto na nos comunidad pero tambe nos bishitantenan. Masha danki pa bo esfuerso y nos ta sigur cu nos comunidad ta orguyoso di mira nos agentenan bay e ‘extra mile’ den nan carera policial.
