Edwin Jacobs, director di SVb:
ORANJESTAD (AAN) – Director di SVb, Edwin Jacobs, den su entrevista cu Matutino DIARIO, relaciona cu e hecho importante cu Dialuna 1 di September 2025, e Fondo di Pensioen di Behes ta cumpli 65 aña di a wordo introduci pa Antiyanan Hulandes, di cual Aruba a forma parti e tempo ey, a señala cu solamente cu AOV si, no por bay cu pensioen, no ta permiti esaki.
“AOV tin cu sigui funciona pa nos, y ta un momento cu nos por conmemora y tambe reflexiona. Nos ta mira atras y wak con importante e fondo aki a pa nos hendenan. Si nos para un rato keto, cu e pensioen di soltero na 1960, ora el a wordo introduci, tabata di 55 florin, e tempo ey ‘heldo” Antiyano (no tabata tin florin e tempo ey), cu awe ta 605 florin. Mientras tanto nos por a logra fortifica e fondo, awe e pensioen di behes na 1.296 florin, ademas cu gobierno ta duna nos grandinan 450,= florin. Pues, un grandi cu tin solamente su pensioen tin un entrada di 1.746 florin”, Edwin Jacobs a splica.
El a indica cu esaki ta casi tres biaha mas di locual nos grandinan tabata ricibi na comienzo di e sistema. “Esaki ta representa e exito cu nos tabatin como pueblo, den maneha e den maneha e fondo, den tin un economia cu por cubri e fondo aki cu entrada.
“Corda bon, e trahador su prima ta locual ta bay den e fondo, cu nos por paga e grandinan. Pues, si no tin un economia pa percura pa trabao y pa salario, no tin un prima pa entrega pa pon’e den e fondo. Pues e ta un momento cu nos por wak atras y celebra e exito cu nos por tin un sistema akinan pero na mes momento, e ta pa nos reflexiona. Nos a yega te akinan pero esaki no ta e nota final di bo pensioen di behez. Nos mester percura pa e generacionnan cu ta bay bin, tambe por disfruta di mesun sistema di pensioen di behes cu e generacionnan actual a disfruta di dje”, Edwin Jacobs a remarca.
“Pues, nos tin tur motibo pa nos por conmemora, reflexiona y celebra 65 aña di nos sistema cu a nifica un cambio asina grandi den nos bida”, Jacobs, director di SVb a señala.
