ORANJESTAD (AAN): Homber G.K. a wordo declara liber di posesion di arma di candela, pero a wordo condena pa bendemento di droga y maltrato di su pareha y causa destruccion.
Ta asina cu G.K. tabata encarcela pero entretanto a wordo laga liber. E acusacionnan cu Fiscal a presenta den Corte contra G.K. ta, cu el a viola ley di droga entre 1 December 2024 y 30 Januari 2026. E tabata den posesion di un revolver Caliber 38. E ta wordo acusa tambe di maltrato di su pareha y destruccion di tire di auto di e pareha riba 11 November 2024.
Bende droga: Hues a bisa cu 30 Januari 2026, Polis a detene G.K. despues cu na December 2025 a haya tip di banco di depositonan sospechoso cu G.K. tabata haya cu ta mustra cu e ta bende droga. Polis a bay scucha combersacionnan y a constata cu G.K. tabata bende droga. Polis a haci investigacion na apartamento unda G.K. ta biba y a haya droga.
Polis a investiga e cuenta di banco di G.K. caminda a mira cu hendenan tabata usa code: “ayaca” y “arepa” riba placanan cu ta wordo deposita. E placanan tabata pa cumpra droga. Polis a interoga 4 testigo cu lo a cumpra droga, kendenan ta bisa di a cumpra for di G.K.
G.K. a bisa Hues cu e ta un adicto di marihuana y tabata parti marihuana cu su amigonan. El a bisa cu e no tabata bende pa haya ganashi pero pa haya placa pa e por cumpra mas marihuana. E depositonan riba cuenta ta esnan cu tabata cumpra marihuana for di dje. El a bisa Hues cu awor e ta realiza cu el a wordo perhudica.
Posesion di revolver: Hues a mustra cu ora Polis a interoga e amiga di G.K., el a bisa cu G.K. tin un arma. Na November 2025, Polis a haci investigacion na e edificio di apartamentonan y a haya un revolver bao di un trapi scondi. E sospecha cu e arma lo ta di G.K. A haci investigacion di DNA y Instituto Forense di Hulanda (NFI) ta mustra cu no tin muestra di DNA di G.K. riba e revolver
Ta asina cu G.K. ta para riba cu e arma no ta di dje. El a splica Hues cu e porta di e edificio ta habri y ken cu ta por a pone e arma na e trapi. Den edificio tin 8 apartament. Hues a bisa cu investigacion ta mustra cu e revolver ta real.
Maltrato di dama: Hues a sigui bisa cu Polis a haya notificacion di e mama di G.K. cu su yiu ta bringa cu su pareha. E pareha a haci denuncia contra G.K. cu G.K. a gar’e na cabey y a dal’e. Segun G.K. e mama di su yiu tabata haci su bida imposibel. Segun G.K., riba social media, e pareha tabata pinta G.K. malo. E dia ey G.K. kier pa su yiu keda drumi cerca dje. E amiga y otro 2 dama a bin na e edificio y haci desorden. E mama a bay hiba e cosnan di e yiu y nan a tira e cosnan riba e mama. Segun G.K. for di e di dos piso, el a mira tur loke a sosode E ora ey G.K. a core baha for di dos piso y a ranca e pareha na su cabey. El a desmenti di a dal e ex pareha. G.K. a admiti tambe cu el a destrui e tirenan di auto di e ex pareha. El a bisa Hues cu esaki a sosode un dia caminda diripiente e ex pareha tabata sigui su tras den auto y na dado e ex pareha a bay bringa cu ne. Segun G.K., awor cos ta bayendo bon y tin palabracion cu den weekend e yiu por keda cerca G.K.
G.K. a bisa Hues cu e ta realiza cu tur loke el a pasa aden, no a yuda cu nada. El a pidi Hues un chens pa e hiba un mihor bida. El a splica cu awor el a cuminsa traha.
Fiscal: Fiscal a bisa Hues cu e ta haya legalmente proba cu G.K. tabata bende droga y posesion di arma di candela. Fiscal a mustra cu Polis a investiga G.K. y a constata cu e tabata bende droga. A haya un poco marihuana den e apartamento di G.K. y a confisca placanan. Investigacion ta mustra cu hendenan tabata haci depositonan chikito riba cuenta di banco di G.K., pa cumpra droga usando e code “ayaca” y “arepa”. Fiscal a sigui bisa cu a scucha 3 testigo y e pareha di G.K. Fiscal a remarca cu den Corte G.K. a admiti di a bende marihuana mientras cu na Polis e tabata nenga. Fiscal ta haya cu pa un periodo di 1 aña, G.K. tabata bende droga. Tambe tin e caso di arma di candela. E pareha di G.K. a bisa Polis cu G.K. a bis’e cu e tin un arma. Investigacion di N.F.I. ta mustra cu no tin muestra di G.K. riba e revolver cu Polis a haya. Fiscal a pidi Hues pa declara G.K. liber di posesion di arma.
Pa loke ta maltrato riba 11 November 2024 y destruccion, Fiscal ta haya legalmente proba. Fiscal a mustra cu bendemento di droga ta un caso serio. Marihuana ta e comienso di adiccion cu ta causa hopi criminalidad y problema den famia. Pa cu e castigo, Fiscal a bisa cu el a tene cuenta cu awor G.K. tin trabao y no ta haya cu e mester bolbe bay KIA. Fiscal a exigi 250 dia di prison di cual 35 dia ta condicional, kitando 215 dia cu G.K. tabata sera den KIA, cu 2 aña di prueba. E droga ta wordo destrui. E placa y cellular lo keda confisca.
Abogado: Abogado mr. Ras a bisa Hues cu G.K. no tabata bende na gran escala. E tabata adicto y tabata comparti cu conocinan. E abogado a bisa cu Polis no a haya balansa y tampoco cantidad grandi di droga. El a bisa cu G.K. a admiti di a bende pa asina por cumpra marihuana pa sigui uZa. Tambe e abogado a mustra cu e testigonan, kendenan tambe tabata wordo persigui, a declara contra G.K. pa beneficia nan mes. E abogado a bisa Hues cu no ta asina cu G.K. tabata bende pa un periodo largo manera e acusacion ta mustra. Pa loke ta e arma, e abogado a bisa cu Polis no a haya G.K. cu e arma y tampoco na e compleho di apartamento. A haya e arma na e trapi y NFI ta mustra cu no tin ningun indicacion cu e arma ta di G.K. Abogado a bisa cu e ta comparti punto di bista di Fiscal cu mester declara G.K. liber pa e arma.
Sentencia: Hues a sera tratamento di e caso y a dicta sentencia di biaha. Hues ta haya legalmente proba cu G.K. tabata bende marihuana. Hues ta kere cu G.K. tabata bende hopi mirando cu hopi placa tabata wordo deposita riba su cuenta di banco. E arma no ta di G.K. No a haya DNA di G.K. riba e arma. Hues a declara G.K. liber pa e acusacion di arma di candela. Pa loke ta e maltrato di e dama y destruccion di tirenan di auto, Hues ta haya legal proba.
Hues a hala atencion di G.K., cu si e bolbe cay sera, e tin e caso aki y un caso recien cu ta colga riba su cabez. Hues ta di acuerdo cu e exigencia di Fiscal. Hues a condena G.K. na 250 dia di prison di cual 35 dia ta condicional, kitando 215 dia cu G.K. tabata sera den KIA, cu 2 aña di prueba. E droga ta wordo destrui. E placa y cellular lo keda confisca.
