Aunke cu e acusado ta para riba cu e no a tira
ORANJESTAD (AAN): Dialuna mainta Hof di Corte Superior a trata e apelacion di e homber G.C. (30) contra su castigo di 6 aña di prison. Procurador General (PG) a pidi Hof pa confirma e castigo mientras cu abogado mr. D.Croes ta haya cu no tin prueba y mester declara G.C. liber.
Un cantidad di miembro di famia tabata presente den Corte pa scucha tratamento di e caso.
Sentencia: Na Mei 2024, Hues a bisa cu ta legalmente proba cu G.C. riba 1 Januari 2024, a purba mata e pareha den un auto, e dama M. y e homber S., door di tira den nan direccion. Tambe cu G.C. tabata den posecion di arma di candela. Hues a bisa cu defensa mr. D. Croes, a presenta un scenario otro caminda cu e homber S. mes a tira riba su auto y laga mustra cu ta G.C. Hues a bisa cu e bala a bora e windshield patras y a haya e bala den dashboard di e auto. Hues ta haya cu no tin suficiente prueba pa mustra cu e scenario alternativo lo ta real. Na opinion di Hues, no tin motibo pa duda den declaracion di e denunciantenan, e dama M. y e homber S. Hues a bisa cu ora tira riba un auto caminda tin hendenan sinta, ta tuma riesgo cu e hendenan por muri. Esey ta encera intento di mata y posecion di arma di candela. Pa cu e castigo, Hues a bisa cu e ta tene cuenta, cu net riba aña nobo 2024 den Maria Cristinastraat, G.C. a tira riba un auto. A pone bida di hende den peliger. Loke G.C. a haci ta causa sentimento di inseguridad. Posesion di arma di candela ta hopi serio y ta causa inseguridad den comunidad. Hues a condena G.C. na 6 aña di prison, kitando e tempo cu e ta sera. Tur loke a wordo confisca mester wordo duna bek.
Sospechoso ta para riba cu e no a tira: Dialuna, PG a acusa G.C. cu riba 1 Januari 2024, a purba mata un pareha den auto, door di tira riba e auto. PG ta acusa G.C. tambe di posesion di arma di candela. Ta asina cu G.C. a apela e castigo pasobra e ta para riba cu e ta inocente.
Hof a bisa cu den oranan di marduga, algo pasa di 5’or, segun G.C. e tabata tira klapchi. Hof a bisa cu tin video di seguridad. Presidente di Hof a bisa cu remarcabel ta cu den e caya tabata hopi keto. G.C. a bisa cu el a bay na un lugar, caminda e tabatin tiramento di palabra cu e homber S. Un amigo a bisa G.C. pa no haci caso y pa cana bay. Nan a cuminsa cana bay na na dado momento G.C. a mira su amigo M. a baha cabez y a bisa G.C. cu un boter a hera dal e. Esey ta indica cu e homber S. lo a manda un boter riba G.C. G.C. a sigui bisa cu 1 Januari 2024, e tabata na cas di su mama tirando klapchi. Na dado momento el a mira un auto cu luz bright bin for den direccion contrario. Na dado momento el a scucha un homber bisa, “mi ta bay tira bo”. Esey tabata e homber S. E momento ey G.C. a spanta y a core drenta cas. Ora el a sali bek pafor, e auto a bay. Hof a mustra cu e amigo di G.C. cu tabata na e cas, A., a declara cu el a cende 2 klapchi y G.C. no a tira klapchi. Na dado momento A. a bay orina den e cas y no a scucha G.C. tira klapchi. El a bisa tambe cu G.C. no a bis’e nada di cu tabatin un problema cu S. Hof a sigui bisa cu e pareha den auto a bisa cu nan a mira G.C. a saca un arma y ora nan a core bay, nan a scucha un sonido y e windshield patras di e auto a kibra. G.C. a desmenti completo cu el a tira y tampoco su amigo A.
G.C. a remarca, pakico e ta bay tira riba e auto. Hof a bisa cu Polis a haci investigacion y a constata un buraco den e windshield patras y a haya un bala den e radio di e auto. Polis a haya tambe, 9 dia despues, partinan di glasnan kibra di e auto riba caminda cerca di e cas di mama di G.C. G.C. a bisa cu e no tabatin arma y ningun momento el a tira. El a bisa Hof, cu e ta haya straño tur esaki y no por bisa con e windshield patras a kibra. El a bisa Hof cu e no ta tipo di persona asina. El a admiti di a bebe alcohol y huma marihuana pero no cu e tabata hopi bou influencia. El a bisa cu tabatin un discusion cu S. riba pago pero esey a keda regla. Hof a mustra tambe cu algun dia despues, S. a manda un mensahe pa G.C. caminda e ta pidi disculpa pa loke a pasa. Segun G.C., S. ta un persona cu ta haci su cosnan bon. Segun G.C., awor cu e ta sera den KIA el a bin haya sa cu S. tin hopi problema. G.C. ta para riba cu e no tin nada di haci cu e caso aki. G.C. a bisa cu e tin 16 luna sera den KIA y ta haya cu S.. y su pareha M. a gaña riba dje, pa e bay sera.
PG a exigi 6 aña di prison: PG a bisa Hof cu corectamente Hues den Promer Instancia a dicidi cu G.C. ta culpabel di purba di mata door di tira riba e auto y cu G.C. tabata den posesion di arma di candela. PG a mustra cu abogado mr. D. Croes a bisa cu ta e homber S. mes a tira riba e auto pa asina haci daño na G.C. PG a sigui bisa cu Hues no a kere declaracion di G.C. cu e no a tira. Hues ta haya cu G.C. a tuma riesgo cu door di tira, e por a mata un di e hendenan den auto. PG a pidi Hof pa mantene e castigo di 6 aña di prison.
Abogado: mr. D.Croes a bisa Hof cu PG no por a demostra cu G.C. ta esun cu a tira y pesey ta pidi Hof pa declara G.C. liber. Abogado ta haya cu declaracion di e pareha M. y S., ta contradeci otro y despues nan a wordo adapta pa ta mesun cos. E abogado a remarca cu un rato promer S. a tira boter riba G.C. El a mustra cu S. a haci menazanan serio riba G.C. Despues S. ta bay cu auto te na cas di G.C. y a bis’e cu e lo bay tir’e. Na opinion di mr. Croes, e forma di core auto den direccion contrario, ta un accion criminal pasobra S. sa masha bon unda G.C. ta biba y no ta manera nan a declara cu nan no sa unda G.C. ta biba. E abogado a remarca cu si realmente G.C. a tira, ningun hende no a ripara nada. E ta kere cu si G.C. a tira, hendenan lo a core y lo tabatin hopi desorden. Pero esey no tabata asina. E abogado a remarca cu den auto, ta dura mas o menos 3 minuut pa yega e cas unda G.C. tabata pero segun e pareha a dura 15 minuut. Na opinion di e abogado, esey ta haci cu e pareha por a haci tur cos cu nan tabata desea pa perhudica G.C. E abogado a mustra cu promer e pareha ta bisa cu G.C. tabata pafor di cura. Despues nan ta bisa cu G.C. tabata den cura.
No tin prueba: mr. Croes a bisa Hof cu tur esnan cu tabata na e cas ta bisa cu G.C. tabata paden den cas y no pafor manera e pareha ta bisa. Pa loke ta tiramento, e abogado a mustra cu e pareha M. y S. ta bisa cu ta pafor di e cas G.C. a tira y despues ta bisa cu ta paden di cura G.C. a tira. El a remarca cu Polis no a haci muestra di tiro riba man di G.C. E abogado a bisa cu tabatin 5 hende na e cas y ningun hende no a tende nada di tiro. E abogado ta haya cu e declaracion di e dama M. y e homber S. ta contradictorio y no por saca afor kico realmente a pasa. E no ta haya cu tin suficiente prueba cu G.C. a tira riba e auto. Abogado mr. Croes, ta haya cu G.C. a keda consistente cu su declaracion mientras cu e pareha cu a haci denuncia, nan declaracion ta contradictorio.
E abogado a cuestiona e hecho cu nunca G.C. por a tira directo riba e windshield. Pesey e pareha a cambia nan declaracion cu ta for di riba caminda. E abogado a remarca cu e glasnan kibra, a wordo tira despues riba e caminda pa laga pasa cu ta eynan a wordo tira. E abogado a remarca, con por ta posibel cu Polis no a haya huls. E abogado a señala na Hof cu e glas di auto ta getint y con por ta cu e parti di glas cu a haya riba caminda, ainda tabata riba e windshield. Si a tira riba un distancia, por a mira e glasnan kibra pega na e tint di glas di auto y no riba caminda. Mr. Croes a mustra e scenario cu ta S. mes a tira riba su auto pa asina G.C. bay sera. E abogado ta lamenta cu Corte no a acepta e otro declaracionnan caminda hendenan ta splica con S. ta venga riba hende. Abogado a conclui cu mester declara G.C. liber.
Hof a bisa cu dia 11 Juni pa 1.45 merdia lo tin sentencia.
