E piscado cu a uza su boto pa transporta e droga a haya condena di 4 aña
ORANJESTAD (AAN): Dialuna mainta, Hues di Corte di Husticia a dicta sentencia den e caso penal cu Ministerio Publico a cuminsa contra e miembro di Guarda Costa, Boekhoudt y e piscado A. Laveist. Ta asina cu e caso contra Boekhoudt a wordo trata separa y riba un otro fecha cu esun di Laveist.
For di e investigacion ta sali na cla cu na Januari 2023 lo a importa 100 kilo di cocaina, caminda a haci uzo di Laveist cu a bay tuma e droga ariba laman for di un otro boto y trece tera.
10 AÑA DI PRISON EXIGI
Recien, Corte di Husticia a trata e caso contra Boekhoudt, kende ta wordo acusa:
- di a yuda importa droga;
- saca secreto di Guarda Costa;
- mal uzo di su funcion;
- di a wordo cumpra;
- forma parti di un organizacion criminal
Ta asina cu Fiscal a exigi 10 aña di prison pa Boekhoudt
5 AÑA DI PRISON EXIGI PA PISCADO
Corte di Husticia recien a trata e caso penal cu Ministerio Publico a cuminsa contra e piscador A. Laveist. Ta sospecha Laveist di ta esun cu a trece lote di droga entre 1 Januari 2023 te cu 13 Februari 2023. Fiscal a exigi 5 aña di prison p’e.
SENTENCIA
Dialuna mainta Hues a dicta sentencia promer pa Laveist y despues Boekhoudt. Hues a bisa cu e ta haya legalmente proba cu Laveist tabata esun cu a trece 100 kilo di cocaina. Pa cu e castigo, Hues a bisa cu e ta tene cuenta cu actualmente Laveist ta sintando castigo di 5 aña di prison pa e lamentabel caso di e dama Yohana, cu riba 22 Maart 2023 a perde riba laman. Hues a condena Laveist na 4 aña di prison.
Despues a drenta sala di Corte, Boekhoudt. Hues a bisa cu e ta haya legal casi tur e acusacionnan. Hues no ta haya proba cu Boekhoudt tabata envolvi den e caso di Yohana. Hues a cuestiona e hecho cu un miembro di Guarda Costa ta haci algo asina. Hues a condena Boekhoudt na 8 aña di prison y cu pa 13 aña e no por traha ningun caminda den Gobierno.
