Den Corte
ORANJESTAD (AAN): E hombernan Venezolano, D.G.L. biba na Aruba, E.A., e Arubiano E.V. mester a presenta den Corte pa e caso penal cu Ministerio Publico a cuminsa contra nan. Ta asina cu E.A. no ta na Aruba pero a wordo representa pa abogado mr. Emerencia.
E acusacion cu Fiscal a presenta contra e trio ta cu riba 26 Januari 2025, nan a bati e cliente di inicial R. pafor di Lekker na Noord.
Bati homber: Hues cuminsa cu D.G.L. kende a bisa cu a sosode algo cu un dama den e seccion di VIP di e Club Nocturno. Aki D.G.L. como bouncer/security a mira un homber ta mishi di patras na e dama. E momento ey e dama a reacciona. Segun D.G.L., el a yama su otro coleganan bouncer pa saca e homber pa evita problema.
Ora el a mira cu ningun colega a bay, e mes e ora a bay na e homber kende tabata nenga di sali. D.G.L. a lanta e homber, pero e ultimo a bira violento. E momento ey e otro coleganan bouncer a yega y a saca e otro amigo cu tabata cu e homber.
D.G.L. a bisa Hues cu na dado momento e situacion a escala ora cu e homber R. kier a drenta e Bar bek. E homber R. a dal e bouncer E.V. cu tabata para su dilanti. E momento ey E.V. a defende su mes y despues a cay. D.G.L. a bay yuda y e homber R. a bay riba D.G.L. Un colega a kita e homber R. y e momento ey D.G.L. a scop e den cara.
Hues a remarca cu D.G.L. ta bisa cu el a bay yuda su colega pero aki ta papia di 3 contra e homber cliente. Hues a bisa cu e homber cliente R. a haya un scop den cara. El a puntra si esey tabata necesario. D.G.L. a contesta cu el a reacciona asina door di e violencia di R. y e no tabata accion di venganza. E tabata su defensa y manera a caba, nan tur a bolbe drenta. El a bisa Hues cu e trabou di Bouncer no ta nada facil y hopi biaha tin di actua di biaha pa evita cu cos ta escala.
Hues a sigui cu E.V. E acusado a bisa cu el a yuda D.G.L. saca e homber R. pafor cu tabata resisti. Pafor a papia cu R. pero R. a dal’e un mokete den pecho. E ora ey el a reacciona y dal’e dos mokete na cara y a cana bay paden. Ora el a bira wak pafor, el a mira R. drumi abao.
Hues a bisa cu e homber cliente R. a declara cu e tabata na Lekker cu un amigo. Na dado momento sin motibo, el a wordo pusha door di un muher. Bouncernan a sak’e y maltrat’e. E amigo di R., esta e cliente di inicial M., a bisa cu el a mira cu e Bouncernan a maltrata R. sin motibo. Hues a bisa cu tin potret con R. a wordo maltrata. Su lipnan hincha y corta.
Relaciona cu e caso aki, ambos a keda 4 dia cera na warda di Polis.
Fiscal a exigi castigo combina: Fiscal a bisa Hues cu e ta kere D.G.L., cu e trabou di Bouncer no ta facil. Fiscal a bisa cu un Bouncer no tin ningun autoridad. Den cierto situacion nan por actua. Fiscal a bisa cu e pregunta ta, si nan por a actua den defensa propio. Fiscal ta haya cu aki no por bisa cu nan a actua den defensa propio. Riba video di seguridad no ta mira cu e homber R. a resisti. Riba e video ta mira cu nan ta maltrata e homber R. di tal forma cu e ta perde conocimento.
Fiscal ta haya cu D.G.L. a skop y dal e homber R. E ta haya cu E.V. a dal R. dos mokete. E homber E.A. tambe a dal. Fiscal no ta haya e forma con E.V. a actua corecto. El a bisa cu si R. a dal E.V. un mokete, pakico E.V. ta dal dos mokete. E ta haya cu nan a actua pa demostra poder. E ta haya cu pa violencia publico mester exigi pa e bouncer E.V. un total di 100 ora di trabao pa comunidad of 50 dia sera y 2 siman di prison cu 2 aña di prueba. Pa e bouncer D.G.L., Fiscal a exigi 180 ora di trabao pa comunidad of 90 dia sera. 1 luna di prison condicional cu 2 aña di prueba. Pa A.R. el a exigi 2 luna di prison condicional cu 2 aña di prueba.
Abogado: mr. Emerencia a bisa Hues cu door cu D.G.L. a mira cu R. a mishi cu un dama di patras, el a actua pa evita cu situacion ta escala. Nan a purba papia cu R. pero R. no kier bay pafor y hasta a dal D.G.L. su mannan. E momento ey, D.G.L. a actua. E abogado a bisa Hues cu e Bouncernan tey pa mantene orden den e lugar. No tin nada di muestra di poder manera Fiscal ta pretende.
E abogado a cuestiona opinion di Fiscal cu E.V. a actua exagera. Na opinion di mr. Emerencia, E.V. a reacciona ora R. a dal’e. E abogado ta haya cu D.G.L. a actua segun protocol. A bay papia cu R. y door cu R. no kier a coopera, a actua di biaha pa evita e situacion escala. E abogado a remarca cu si R. a coopera for di ora D.G.L. a bay papia cu ne, nada lo a sosode.
Hues a bisa cu e ta bay studia e caso y dia 12 Februari 2026, e lo duna su sentencia.
