Apesar cu abogado ta cuestiona testigonan adicto cu Polis ta usa
ORANJESTAD (AAN): E hombernan S. y C.M. acusa a presenta dilanti Hues pa e caso penal cu Ministerio Publico a cuminsa contra nan. Fiscal ta acusa S. cu riba 21 Mei 2024 e tabata den posesion di cocaina y marihuana. Tambe Fiscal ta acusa S. cu entre 21 April 2024 y 21 Mei 2024 e tabatin pistol. Fiscal ta acusa C.M. cu riba 21 Mei 2024, e tabatin 9 gram di cocaina y casi 100 gram di marihuana.
Polis a haya droga y arma: Hues a bisa cu na dado momento Polis a cuminsa investigacion a base di tip cu a drenta, cu S. yama (Coco), lo tin un arma y ta den Rancho. Tambe tabatin informacion cu tin un dama T. ta bende droga na un cas na Rancho. Polis a haci investigacion na dos cas den Rancho y na Sero Patrishi na cas di S. A haya na cas di S., droga y arma y tambe a confisca smartphones di S. Tambe a haya S. cu 25 gram di cocaina y 14 gram di marihuana.
Ta asina cu S. a admiti cu e droganan ta di dje. Tambe el a admiti cu e pistol ta di dje y e balanan. S. a bisa Polis cu e tin e arma pa proteccion di su mes. Segun S., el a cay den un caso di tiramento y door di miedo, el a busca arma pasobra e no sa ki intension e persona tin. Ta asina cu e persona a tira riba S. y S. a tira bek. Esaki a sosode algun dia promer cu S. tabata cla pa bay Hulanda.
Hues a remarca cu S. sa di e peliger di arma y tog a tira. S. a bisa Hues cu e lo no bay haci’e mas. S. a bisa cu e droga ta pa su mesun uso. A confisca un auto BMW, brommer, cadena y rechinan di oro. Hues a bisa cu aparentemente S. a haya e auto y brommer bek. Segun S. e no a haya nada bek.
Nenga di ta bende droga: Hues a bisa cu C.M. a admiti cu e droganan ta di dje. Hues a mustra cu Polis a bay haci mas investigacion y tin 5 testigo a bisa cu nan a cumpra droga pa un tempo largo for di C.M. Segun C.M. e testigonan no ta bisa e berdad. El a bisa Hues cu e tin prueba cu e tabata traha y door di esey e no tabatin mester di placa.
Segun C.M., e hendenan a wordo manipula. El a bisa cu tur ta adicto na droga y un otro ta pashent di Respaldo. El a bisa cu Polis a investiga na su cas y no a haya nada cu ta mustra cu e ta bende. El a bisa cu e no conoce e hendenan. E ta kere cu esnan di departamento di narcotica a busca e hendenan pa duna declaracion manera cu e agentenan di narcotica kier. E ta kere cu e hendenan lo tin rabia riba dje. Segun C.M. e ta conciente cu e tin problema di adiccion na droga. Ta asina cu C.M. a haya su brommer bek pero nada di su 4 smartphonenan.
Hues a bisa cu e kier sa di Fiscal con a para cu e cosnan confisca. El a bisa cu S. na 2022 a wordo condena pa posecion di arma di candela. Na 2017, S. a wordo condena pa caso di droga. Hues a mustra cu C.M. na 2016 condena pa caso droga.
Hues a puntra Fiscal con a para cu e dama T. Fiscal a bisa cu a laga T. liber pero e lo wordo persigui.
Fiscal: Fiscal a bisa Hues cu e ta haya legalmente proba cu S. y C.M. tabatin cocaina y marihuana den nan poder. Tambe cu S. tabatin un arma di candela. Fiscal a bisa cu tin 5 testigo cu a wordo interoga y nan ta reconoce C.M. y cu tabata cumpra droga for di dje. Tin ta bisa cu for di 2018 tabata cumpra for di C.M. Fiscal a bisa cu droga ta pone salud di hende den peliger. Droga ta causa adiccion cu ta crea criminalidad.
Ademas arma di candela, ta un menaza pa comunidad. Fiscal a mustra cu den pasado S. a wordo condena caba pa arma di candela. Fiscal ta haya cu S. ta un persona avisa caba pero tog a busca un arma pa proteha su mes. Fiscal a exigi pa S., 18 luna di prison di cual 6 luna ta condicional cu 3 aña di prueba. Pa C.M., Fiscal a exigi 30 luna di prison di cual 6 luna ta condicional cu 3 aña di prueba. Pa loke ta cosnan confisca, Fiscal a bisa cu pa S. e droganan lo wordo destrui, e auto y brommer mester wordo debolbe y smartphones. E arma lo wordo destrui.
Pa loke C.M., e placanan lo keda confisca. E cellular lo wordo debolbe. Fiscal a bisa cu e no tin informacion riba e prendanan di S. cu a wordo confisca. El a bisa cu mester investiga esaki.
ABOGADO
Abogado Mr. Hernandez a bisa Hues cu S. a admiti e droganan y arma cu e tabatin. Pa loke ta e castigo, e ta haya cu esaki ta mucho halto. El a bisa cu e arma tabata den posesion pasivo o sea, S. no tabata cana cu e arma rond. Ta algun siman so e tabatin e arma. E abogado a pidi Hues pa tene cuenta cu esaki y duna castigo igual na loke S. ya ta sera den KIA cu ta mas o menos 7 luna. Pa loke ta e prenda, e abogado ta haya cu lo mester haci investigacion.
Pa loke ta C.M., mr. Hernandez a bisa Hues cu C.M. a admiti di tabatin droga pero nada di bendemento entre 2021 – 2024. E abogado ta haya cu e declaracion di e testigonan, no por wordo considera confiabel. El a mustra carta di doño di trabao di C.M. cu desde 2019 C.M. ta trahando te 2023. E abogado a remarca, con por ta posibel cu testigonan ta bisa cu nan ta cumpra 5 pa 7 biaha pa dia den Rancho for di C.M. cu ta sinta dilanti un cas. Na opinion di abogado, e carta ta mustra bon cla cu C.M. ta trahando. Mr. Hernandez a cuestiona e interogacion di testigonan cu ta mas bien adicto di droga pisa cu ta biba riba caya y Polis ta uza nan. E abogado ta haya cu nan estado mental no ta completo. Awor ta acusa C.M. a base di declaracion di 2 testigo y Fiscal ta exigi castigo pisa. E abogado a bisa Hues cu e ta haya cu ta na 2024, C.M. lo a cuminsa bende droga.
SENTENCIA
Hues a sera tratamento di e caso y a dicta sentencia di biaha. El a cuminsa cu S. Hues ta haya legalmente proba cu S. ta culpable di posesion di droganan y un pistol cu bala na su cas. S. a admiti cu e droganan y arma ta di dje. Hues a bisa cu droga ta forma un peliger grandi pa salud di hende. Arma ta un peliger grandi pa comunidad. Hues a bisa cu e ta tene cuenta cu S. tabatin droga pa su mes. El a mustra cu den cas di S., tabatin muchanan chikito y e arma tabata den un cashi pero no na yabi. Tambe Hues a tene cuenta cu anterior a condena S. pa arma y awor, S. a cay sera durante su tempo di prueba. Hues ta haya cu e castigo, no a yuda pa S. stop di uza arma di candela. Door di esey e castigo pa arma lo subi. Hues ta haya e castigo exigi pa Fiscal na su lugar. El a bisa cu e placa confisca lo wordo debolbe, e auto y bromer lo wordo debolbe y cellular. E droga y arma lo wordo destrui. S. a wordo condena na 18 luna di prison di cual 6 luna ta condicional cu 3 aña di prueba.
Pa C.M., Hues a bisa cu e ta haya legalmente proba, posesion di droga. Hues a bisa cu C.M. a admiti esey. E ta haya cu C.M. tabata bende droga y durante e periodo cu ta menciona. Na opinion di Hues, tin testigonan cu ta bisa cu a cumpra for di C.M. Hues a remarca cu e hecho cu nan ta adicto no ta haci cu mester desconfia den nan declaracion. Pa loke ta e carta di trabou cu abogado a presenta, Hues ta haya cu no ta exclui cu C.M. lo por tabata bende droga. Hues a bisa cu e exigencia di Fiscal ta na su lugar. Hues a condena C.M. na 30 luna di prison di cual 6 luna ta condicional cu 3 aña di prueba.
