Relaciona cu su funcion na Veiligheids Dienst Aruba
ORANJESTAD (AAN): Diaranson mainta Corte di Husticia den Promer Instancia a trata e caso cu Dophi Richardson a cuminsa contra Veiligheids Dienst Aruba(VDA).
Den sala di Corte por a mira diferente coleganan di trabao di Dophi Richardson, dos hurista di Gobierno y diferente funcionario.
INVESTIGACION TABATA LEGAL?
Abogado mr. D.Kock, kende a representa Richardson, a bisa Hues cu e pregunta ta, si VDA a actua legal pa hala aden e documento di integridad di Richardson. Na opinion di mr. Kock, VDA a actua contra ley.
E abogado a mustra cu na September 2023 Richardson a wordo yama pa haci e investigacion di seguridad. E abogado a bisa Hues cu e promer investigacion di seguridad tabata na 2020 y segun ley e tin un valor di 5 aña. Mr. Kock ta haya cu no tabatin ningun motibo di urgencia pa VDA a haci investigacion na 2023. E abogado a mustra cu VDA ta bisa cu a usa e maneho interno cu ta bisa cu cada 3 aña ta haci e investigacion, pero abogado mr. Kock ta haya cu esey ta contra ley. E abogado a cuestiona e forma con e investigacion a sosode. Mr. Kock ta haya cu e investigacion tabata sin control debido. E declaracionnan di informantenan no tabata firma pa esnan cu a papia y ademas no sa kende e informantenan ta. E abogado ta haya cu door di esaki, no por verifica y no por reacciona riba e declaracionnan.
Mr. Kock a bisa Hues cu esaki no ta cuadra cu un proceso husto di Corte. Na opinion di mr. Kock, VDA a viola e principio di proceso husto. El a bisa cu VDA ta papia di sospechonan pero no tin nada concreto contra Richardson.
TRATO INHUSTO CONTRA DOLPHI
E abogado a bisa Hues cu den sala di Corte, cuater di e 6 coleganan di Richardson tabata presente pa sostene Richardson mientras cu minister ta haya cu a base di e declaracionnan cu no ta firma, Richardson no por traha como director di VDA. Mr. Kock ta considera esaki, un trato inhusto. E abogado a bisa Hues cu te dia di awe, Richardson ta trahando na e mesun departamento. Esaki ta un muestra cu no tin ningun motibo di risico pa seguridad di estado.
E abogado a remarca cu na VDA, ta parce cu asuntonan priva di Richardson, ta motibo di tuma accion contra Richardson pero esey no tin nada di haci cu violacion di seguridad di estado. Mr. Kock a remarca cu Richardson no ta traha na Vaticano.
El a mustra cu VDA a uza acusacionnan difamatorio contra Richardson pa pon’e un banda. Mr. Kock ta haya cu esaki ta un venganza di parti di VDA contra Richardson. E abogado a mustra cu Comision di Evaluacion a traha un raport riba henter e investigacion cu VDA a haci y ta haya cu e investigacion ta sin base. Na opinion di mr. Kock, e decision di VDA ta contra e principio di bon gobernacion. E ta haya cu Hues mester desaproba esaki.
ACERCAMENTO SEXUAL RIBA EMPLEADONAN
E huristanan di Gobierno a bisa Hues cu door di desconfianza, VDA a cuminsa un investigacion di seguridad. Esaki a base di informacion di personanan riba e comportacion di Richardson. E huristanan a mustra cu e comportacion di Richardson ta pone seguridad di estado na peliger.
E huristanan a mustra cu Richardson tabatin relacionnan for di su relacion cu su señora. Segun e huristanan, e señora no sa di e relacionnan y Richardson a bisa cu e y su señora tin palabra cu no ta puntra y haya sa di relacionnan. E huristanan ta haya cu e comportacion aki ta pone e seguridad nacional di Aruba na peliger.
Na opinion di e huristanan, como hefe, Richardson mester a percura pa tin un bon relacion di trabao y no e comportacion cu e tabatin. Nan a mustra cu tabatin acercamento sexual cu cierto personal femenino. Tambe cu lo tabatin fregamento na curpa. E huristanan ta haya cu Richardson no tabata crea un bon ambiente di trabao y no tabata duna bon ehempel. Na opinion di e huristanan, e comportacion aki ta haci cu Richardson no por tin un funcion di confianza pa cu e seguridad nacional.
DOLPHI TRAHANDO PERO NO HEFE
Hues a puntra Richardson si e ta trahando na VDA. Richardson a splica cu e ta trahando normal como empleado pero no como director. Actualmente tin un director interino. E huristanan di Gobierno a bisa Hues cu e hefe, a manda conseho na e ex minister di Husticia pero no tin un decision. Segun e huristanan, e intension ta cu Richardson no mester traha na VDA. Hues a puntra ta con Richardson lo por sigui traha. Segun e huristanan, no tin confianza den Richardson y ta minister mester dicidi.
Riba pregunta di Hues tocante e kehonan contra Richardson, e huristanan a bisa cu di parti di VDA tabatin 2 keho pero un di e damanan tabatin miedo di Richardson y despues di 3 aña segun e maneho interno, a haci investigacion riba Richardson. Hues a remarca cu segun ley manera mr. Kock a bisa, ta un periodo di 5 aña y con por ehecuta investigacion den 3 aña. Hues ta haya cu mester tin motibo di peso pero segun e huristanan di Gobierno no tin motibo di peso sino a ehecuta e maneho di 3 aña. Un hurista a splica Hues cu e ley nobo ta papia di 5 aña pero e maneho tabata 3 aña y tabatin un fase transitorio caminda e keho a cay den e fase aki.
Hues a bisa cu e ta bay evalua e caso y 4 Juni 2025, e lo dicta sentencia.
