Psicologo y Psychiater ta haya cu e acusado tin problema mental
ORANJESTAD (AAN): Diabierna mainta te den oranan di merdia, Hues di Corte di Husticia a tuma pa trata e caso penal contra e homber D.E.(29), kende ta wordo acusa di a hack tres dama, chantahea nan y hasta a viola un di e damanan. Psicologo y Psychiater ta haya cu D.E. tin problema mental y mester haya tratamento na Respaldo. Nan ta haya cu e ta menos responsabel pa su actonan. Fiscal ta haya D.E. culpabel y a exigi 5 aña di prizon.
VICTIMANAN A PRESENTA DEN CORTE
Diabierna mainta por a mira e victima B. y T. a presenta den Corte, acompaña cu famia. Tambe por a mira cu e victima S., bibando na Hulanda, a comunica via video conference pa tambe ta presente.
ACUSACIONNAN
E acusacionnan cu Fiscal a presenta contra D.E. ta:
- Na Juni 2014 a viola e dama S., kende e tempo ey tabatin 17 aña. Ademas S. tabata victima di “hack” y chantahe di D.E.
- Entre Januari 2015 y 11 Januari 2023, a hack y chantahea e damanan B. y T.
VIOLACION
Hues a cuminsa cu e violacion di e dama S. na Curacao na Juni 2014. Hues a puntra D.E. y el a bisa cu tabatin relacion sexual pero no a forza S. y no a uza violencia. Hues a puntra D.E. unda el a conoce S. El a bisa via on line el a conoce S. Nan a sali y tabatin intento di relacion sexual pero no a sigui pasobra S. tabata virgin. Ora el a sinti dolor a stop di biaha. Nan tabata hunto 4 dia y e ultimo dia si a tene relacion sexual y S. no a sinti dolor. Dia 11 Juni 2019, D.E. a viaha di Aruba pa Curacao pa topa cu S. y dia 15 Juni 2019 el a bolbe.
CHANTAGEA DAMA
Hues a bisa cu S. a declara na Polis cu bou di presion di D.E. e mester a manda potretnan sunu di dje. Segun D.E., e no a pone presion. Hues a bisa cu S. a declara cu D.E. a hack e ruman muher di S. y tabatin potretnan sunu di e ruman. Pa evita cu D.E. ta publica esakinan, S. a manda potret di su mes. Segun D.E., e y S. tabata forma parti di un grupo cu ta hack computer di hende y tabata chantahea hende. Por a mira riba video conference cu S. tabata yora ora cu D.E. a bisa esey. E tabata sacudi mustrando cu no ta asina. Segun D.E., S. tambe a chantahea e dama T. Hues a bisa cu S. a bisa cu T. a papia cun’e pa haci denuncia contra D.E. Segun D.E., na Januari 2023, el a wordo deteni y S. tabatin miedo cu e lo papia y tur esnan den e grupo di hack lo a wordo deteni. Esey segun D.E., tabata momento cu S. a haci denuncia na September 2023 contra D.E. Hues a bisa cu S. a bisa cu el a warda asina hopi pa entrega keho contra D.E. pasobra e tabata pendiente si D.E. lo publica potretnan di S. y su ruman sunu. Hues a bisa cu S. a declara na Polis cu e motibo cu el a bay topa cu D.E. ta pa D.E. mira cu e ta un persona normal y pa stop di haci loke D.E. tabata haci cun’e. S. a declara na Polis cu e no tabatin intension di tin relacion sexual cu D.E. El a splica cu nan tabata na beach y ora cu S. a bay baña, D.E. kier a bay feita S. na su parti intimo. S. a bisa cu e no tabata kier y tabata sinti incomfortabel. Ora cu Hues tabata bisa esey, por mira cu S. tabata yora. Segun D.E. esey no ta berdad. El a bisa cu tur esey ta inventa door di S. cu tabatin tur e tempo pa planea esey.
Hues a sigui bisa cu S. a declara cu D.E. tabata kier a penetr’e y e no tabata kier. D.E. a purba tog y S. a sinti hopi dolor y a grita no y a cuminsa yora. El a bisa tambe cu e tabata purba cera su pianan y D.E. tabata tene su pianan habri. Segun D.E.D na momento cu S. a cuminsa yora, el a stop y cos no a bay manera S. a bisa.
MENSAHENAN CHANTAGE
Hues a mustra cu tin mensahenan whatsapp di D.E. na S. caminda el a bisa: “I will have my hands on you before you expected”. Segun D.E., esey ta un modus operandi cu Hackers ta usa. El a splica cu S. sa di esaki y ta haci chat coordina entre dos persona banda di otro y asina crea un chat cu no ta real. Hues a sigui bisa cu tambe tin mensahe di D.E. cu ta bisa cu e mester caba loke el a cuminsa aña pasa. Segun D.E., el a manda mensahe pa S. pero cu S. a cambia e text y haci manera cu S. ta wordo chantahea.
NFI NO POR A INVESTIGA YAMADA DI TELEFOON
Hues a mustra cu tin combersacion di S. cu un homber. Hues a puntra D.E. si ta e. El a nenga. Hues a mustra cu den combersacion ta scucha S. bisa cu a viol’e y e persona a bis’e cu e lo bolbe hacie. Segun D.E., esey tabata un forma coordina di graba cosnan y pasa na telefoon manera cu ta un combersacion tin entre dos persona. El a remarca pakico e otro persona tabata papia hopi abao. Hues a mustra den combersacion ta scucha e persona bisa cu el a chantahea y viola. El a pidi sorry y cu e lo kita tur e potretnan di S. El a bisa cu e no ta asina. Hues ta haya cu aki por scucha claramente cu ta admiti. Hues a bisa cu NFI a haci investigacion pa mira si ta reconoce e stem pero NFI a bisa cu no por haya comparacion di e stem cu esun di E.D.
Segun D.E., el a wordo chantahea door di S. na 2021 y a duna S. hopi placa pa no haci denuncia contra dje. El a remarca, pakico S. ta bay tuma placa di un hende cu lo a viol’e. El a bisa cu e tin copia di e transaccion di placa. Hues a remarca cu esey no ta suficiente prueba.
HACK Y CHANTAGEA DOS DAMA
Hues sigui cu e dama B., kende a bira victima di D.E. entre Januari 2023 y Februari 2023. B. a declara na Polis cu e conoce D.E. na 2015 y na 2016, D.E. a manda virus y hack su cellular. B. a bisa cu el a wordo chantahea door di D.E. cu e lo publica potretnan di B. E situacion a bira asina serio cu B. hasta kier mata curpa. D.E. tabata pidi potretnan y video sunu di B. sino lo publica e potretnan cu e tin cu informacionnan. D.E. a bisa Hues cu e grupo di hack tabata ocupa cu B. y na 2017 el a forma parti di grupo y a cuminsa chantahea B. tambe. El a bisa cu e tabata haya orden promer pa haci chantahe pero na Februari 2022 el a cuminsa haci di su mes. Ariba pregunta di Hues, D.E. a admiti cu el a haci di mas y causa hopi daño na B. Segun D.E. e intension tras di esaki tabata pa D.E. haya su placa.
E otro victima tabata e dama T. El a declara na Polis cu na Jan 2021 lo a haya contacto cu un persona “Gues More”. E persona lo a bisa cu e tin potretnan sunu di T. cu ningun hende tin. El a forza T. pa manda potretnan sunu sino lo bay publica e potretnan cu e tin. Na September 2022, T. a haya mensahe di un persona cu un otro nomber y via su famia a bin haya sa cu ta D.E. E.D. a bisa Hues cu e ta admiti cu el a chantagea T. cu e tin potretnan y informacionnan cu e por uza contra dje. D.E. a bisa Hues cu Gues More ta un account cu mas hende den e grupo di hack ta usa y tambe el a usa. E intension tabata pa chantahea pa placa of pa otro cosnan. Segun D.E., e tabata concentra mas riba victimanan den Caribe. El a bisa Hues cu na dado momento el a sali for di e grupo pasobra e tabata haya cu nan tabata hopi bruto y tabata pone T. yora. El a admiti cu e tambe a bay mucho leu y ta duel’e loke el a haci cu T.
DEMANDA DAÑO
Ta asina cu e dama S. na Hulanda a demanda 28.674 florin na daño material pa tur e tratamento cu e mester a sigui na Hulanda. Tambe el a demanda 84 mil florin di daño inmaterial door cu el a keda afecta y awor mester haci 1 aña extra di estudio na Hulanda.
E dama T. a demanda 25.790 florin na daño cu ta encera entre otro tur e tratamento cu e ta hayando.
Hues a remarca si D.E. ta realiza cu e tabata haci hopi malo. Segun D.E., el a realisa na dado momento cu e tabata haci malo. Hues a remarca cu D.E. tabata pone e damanan sufri y tog tabata sigui. D.E. a bisa Hues cu mester corda cu no ta e so tabata manda mensahe sino e otronan di e grupo. Hues a remarca cu ta di lamenta cu D.E. ta papia di un grupo di hack pero no tin nada mas di e grupo aki. Segun E.D., el a duna Landsrecherche informacion di e grupo pero no a haci nada. El a bisa cu Hulanda, Australia y otro paisnan, ta na altura di e grupo aki. El a expresa cu e no ta bay compromete su mes.
FISCAL A EXIGI 5 AÑA DI PRISON
Fiscal a bisa cu e victimanan a sufri pa hopi tempo door di D.E. y nan a keda afecta. E acusado tambe mester haya tratamento pa su problema mental. Fiscal a cuestiona e forma con D.E. tabata hack y forza e victimanan pa manda potret sino lo publica potretnan riba media.
Apesar cu e victimanan tabata roga D.E. pa stop, e no tabata haci caso. Fiscal a tuma D.E. na malo pa su actitud. Fiscal a tene cuenta cu psycologo y psychiater cu ta bisa cu D.E. ta menos responsabel pa su actonan door di su problema mental. Fiscal ta haya cu mirando e seriedad di e caso, no tin espacio pa castigo combina pa D.E. haya tratamento. Fiscal a bisa cu ora D.E. Sali liber e por sigui tratamento. Fiscal a exigi 5 aña di prison pa D.E. Subsidiario Fiscal a bisa cu si Hues ta haya cu castigo combina, por pone e tempo di prueba te 10 aña. Fiscal a aproba e demanda di S.
Hues a sera tratamento di e caso y a bisa cu e mester mas tempo pa studia e caso. El a bisa cu 24 April 8.15, e lo cera tratamento di e caso y di biaha lo tin sentencia.
