Caso den Corte
ORANJESTAD (AAN): Hues a haya e hombernan Venezolano J.M.C. y C.Z.C. culpabel di traficacion di cocaina cu tabata mescla den verf riba cahanan di instrument cu tabata destina pa bay Hulanda.
Exigencia di fiscal: Dia 8 December 2025, tratamento di e caso a tuma lugar caminda Fiscal a bisa Hues cu 3 April 2025, e caso a cuminsa ora cu na Mastercargo Inc., cacho anti-droga a reacciona riba cahanan di instrument. A resulta cu 8 caha di instrument tabatin verf mescla cu cocaina. E cahanan tabata pisa 9150 gram. Despues di calculacion, el a bira 9077 gram. E intension tabata pa manda e carga Hulanda. E cahanan lo mester a bay pa un tal B. na Hulanda.
Fiscal a mustra cu C.Z.C. dos biaha a bay Mastercargo Inc. hiba J.M.C. Ta asina cu C.Z.C. ta nenga di sa algo pero Fiscal ta haya cu e droga ta di C.Z.C. y J.M.C. Fiscal a mustra cu J.M.C. a bisa cu un amigo di Colombia a manda e cahanan y ta C.Z.C. a bay busca e cahanan y hiba nan na su cas. El a bisa cu C.Z.C. a bisa su yiu homber pa traha un pasaporte falso pa J.M.C. cu potret di J.M.C. Ta C.Z.C. a percura pa pone nomber di esun cu ta manda e carga y esun cu ta ricibi e carga na Hulanda. Tabatin potret di rijbewijs di e dama. Fiscal a bisa cu C.Z.C. a haya nomber di B. via di un dama. Fiscal a mustra cu ora Polis a bay pa detene C.Z.C., el a tira su smartphone den e WC den baño.
Fisal ta haya cu J.M.C. y C.Z.C. ta complice di exportacion di cocaina. Pa cu e castigo, Fiscal a bisa cu e ta tene cuenta cu ta promer biaha cu e duo aki ta cay den man di husticia. Nan a organiza traficacion di droga pa Hulanda. Fiscal a exigi 42 luna di prison pa cada un. E droga mester keda destrui. E cellular y placanan cu a haya di C.Z.C. mester keda confisca.
Hues a baha castigo: Diabierna mainta, Hues a bisa cu C.Z.C. a nenga pero Hues ta haya C.Z.C. y J.M.C. culpabel. Hues a bisa cu e ta tene cuenta cu J.M.C. a bisa e funcion di C.Z.C. y despues J.M.C. kier a cambi’e. Hues no ta kere declaracion di C.Z.C., cu e no tin nada di haci cu e caso. Hues a bisa cu J.M.C. a bisa cu C.Z.C. tabatin un funcion importante. Hues a mustra cu C.Z.C. su yiu a trata pasaporte falso pa J.M.C. Den C.Z.C. su smartphone a mira cu na Mei 2025 tabata papia cu a traha riba e cahanan.
Na opinion di Hues, esaki ta mustra cu C.Z.C. tabata preparando transporte di droga.
Hues a bisa cu C.Z.C. y J.M.C. a contribui cu e traficacion di droga ta fomenta criminalidad y pone salubridad publico den peliger.
Hues a rechaza e ponencia di J.M.C. cu ta 4 kilo di cocaina a usa pa mezcla den verf y verf e cahanan. Hues a bisa cu investigacion a mustra cu tin algo mas di 9 kilo di cocaina cu tabata mezcla den e verf cu a usa pa verf cahanan di instrumento. Hues a condena nan na 30 luna di prison.
Hues a bisa cu e placanan confisca di C.Z.C., ta wordo debolbe. E no ta haya cu manera Fiscal ta bisa cu e placa ta procedente di droga.
