Riba peticion di abogado, Hues a pospone e caso
ORANJESTAD (AAN): E homber Dominicano F.D.L.S.D. di 55 aña di edad siman pasa tabata hopi emociona den Corte di Husticia, y tabata insisti cu e ningun momento a maltrata Polis. El a bisa Hues, cu ta mas bien e Agente Policial a maltrat’e sin ningun motibo.
Ta asina cu F.D.L.S.D. a presenta den Corte sin abogado y durante tratamento di e caso, diripiente abogado mr. Illes a presenta. E abogado a pidi Hues pa pospone e caso pasobra e no a haya chens pa papia cu e sospechoso, door cu ta un dia promer Departamento di Asuntonan Social a inform’e cu e ta bay defende e acusado.
Maltrata dos Polis: Fiscal a bisa cu e acusacion contra F.D.L.S.D. ta cu dia 4 Augustus 2022, el a maltrata dos agente di Polis. Acusado F.D.L.S.D. tabata hopi emociona y tabata bisa cu e no a maltrata e dos agentenan y cu e tabata geboei. El a remarca, ta con e por a maltrata e agentenan di Polis, siendo el a worde geboei!
Hues, diferente biaha mester a hala atencion di F.D.L.S.D. pa e keda trankil y scucha kico Hues ta bisa. Hues a puntr’e kico a pasa dia 4 Augustus 2022. Segun F.D.L.S.D., el a pleita cu su yiu pa e auto. El a cuminsa saca tur su cosnan for di e auto. Na dado momento Polis a yega su tras y a bis’e cu e ta deteni. Nan a boei e y el a bay cu nan. Segun e sospechoso, durante cu e tabata canando, Polis a push’e y el a slip den un rooi y cay. Segun F.D.L.S.D., e momento ey, Polis a dal’e.
Sospechoso ta nenga: F.D.L.S.D. tabata hopi emociona y a lanta su manga di flanel pa mustra Hues caminda cu Polis a dal’e cu klop na su man drechi y cu te ainda e tin un bulto eynan. El a sigui bisa cu despues 3 otro agente di Polis a bin lucha cun’e. El a bisa cu un di nan a primi su zapato na su nek. F.D.L.S.D. a para riba cu e no a dal Polis pasobra e tabata geboei. El a desmenti tambe di a morde y skop e agentenan di Polis, manera ta para den e relato di Polis. El a bisa cu e agentenan tin rabia riba dje.
Hues a remarca na F.D.L.S.D., cu mustrando e bulto na man drechi, no ta prueba di maltrato pasobra no tin indicacion cu esaki a sosode riba 4 Augustus 2022.
Abogado a pidi pa pospone caso: Na dado momento, abogado mr. Illes a presenta den sala di Corte. E abogado a informa Hues cu el a haya yamada un dia promer di Departamento di Asuntonan Social pa tuma e caso pero e no a haya oportunidad di comunica cu F.D.L.S.D.
E abogado no tabata na altura cu tratamento di e caso tabata e dia ey. Hues a pospone e caso un rato pa asina e abogado bay pafor di sala y papia cu e sospechoso. Ora e abogado a bolbe den sala di Corte, el a pidi Hues pa pospone e caso pa asina e por prepara su mes pa defende F.D.L.S.D.
Hues, despues di a check e agenda di casonan di Corte, a bisa e abogado cu e caso ta keda pospone pa dia 19 Juni 2025 den oranan di mainta.
