ORANJESTAD (AAN): E hombernan Venezolano L.E.C. di 39 aña, W.V.R. di 34 aña, A.C.H. di 33 aña, y P.C.B. di 53 aña riba
Diabierna mainta a presenta dilanti Hues pa scucha nan sentencia. Tur cuater ta culpabel di importacion di marihuana y cocaina y a wordo condena na 42 luna di prizon.
Intercepta boto cu 17 bulto di droga: Dia 27 di Juni 2025, tratamento di e caso a tuma lugar caminda Fiscal ta acusa e grupo cu riba 13 December 2024 a importa cocaina y marihuana.
Hues a bisa cu Wardacosta di Caribe Hulandes riba 12 December 2024, pa 11’or anochi ta mira riba radar un boto nabegando direccion Sero Colorado. Mas o menos 12’or di anochi, Wardacosta di Caribe Hulandes for di nan pier na Aruba, a saca un boto Metal Shark pa intercepta e boto. L.E.C. y W.V.R. tabata dilanti den e boto y A.C.H. y P.C.B. patras.
E avion Dash-8 di Wardacosta a mira cu a tira 5 bulto den laman y den boto a haya 12 bulto. En total 323 Kilo di marihuana, 27 Kilo di cocaina.
Exigencia di fiscal: Fiscal a bisa cu ta trata aki di 323 kilo di marihuana y 27 kilo di cocaina, cu ta un cantidad grandi di droga. Fiscal a mustra cu droga ta pone salud di hende den peliger.
Fiscal a exigi 42 luna (3 aña y 6 luna) di prison pa nan tur. El a exigi pa destrui e droganan y e boto ta keda confisca.
Sentencia: Diabierna mainta Hues a bisa cu e ta haya legalmente proba cu e grupo di Venezolanonan ta envolvi den importacion di droga riba 13 December 2024. Hues a bisa cu A.C.H. ta e capitan, P.C.B. ta asistente di capitan y L.E.C. y W.V.R. tabata sinta cu e bultonan di droga y nan a tira algun bulto den lama. Hues ta haya cu e grupo conhuntamente a haci e traficacion di droga y cu nan tabata sa cu tin droga den e bultonan. Pa cu e castigo, Hues a bisa cu e ta tene cuenta cu ta trata di un cantidad grandi di marihuana y cocaina cu ta considera pa haci negoshi di droga. Hues ta haya cu e grupo aki, a yuda den circulacion di droga internacional.
Hues a condena nan tur na 42 luna di prizon, cual ta mescos cu Fiscal a exigi.
