Continuacion progreso Aruba ta exigi pa sigui pone fin na corupcion
- Trabou den Gobierno tabata atraccion cu a yuda crea debe nacional
- Aruba a paga den pasado pa dos Ministro, awe sentencia na prison
ORANJESTAD (AAN) Con Gobierno ta haya placa pa goberna y con e mester gasta e placa aki?
E contesta riba e pregunta aki, mester wordo busca directamente den e leynan cu ta stipula con un gobierno mester atende cu placa di Pueblo.
Ta trata aki di uno di e leynan mas sagrado, cu ta base di DIARIO pa por informa Pueblo di Aruba debidamente, si e placa cu Pueblo ta entrega Gobierno na Belasting y tur tipo di pago, ta wordo uza segun reglanan di Ley of a base di corupcion.
Mester pone atencion na e palabra “corupcion”, cu ta uni tur loke por corumpi, destrui bienestar di Pueblo. Corupcion ta igual na e proceso di destruccion.
Ta hustamente pa evita tur mal comprension y asina habri porta pa corupcion, e Ley di Contabilidad (Ley di Atende cu Cifranan) ta base di gobernacion financiero di e pais.
For di momento cu un politico presta huramento como gobernante, e ta hura cu e ta hiba un maneho financiero di acuerdo cu bienestar di e pais. Esaki ta encera cu e cuida placa di Pueblo y ta gasta solamente loke ta necesario pa percura pa bienestar di e pais.
Na final di gobernacion di Mike Eman y e traspaso di mando na e prome Gabinete Evelyn Wever-Cruz, Pueblo por a tuma nota di e desastre cu Gobierno Eman a laga atras den oficinanan di Gobierno y tambe di ekiponan cu Gobierno a cumpra y cu nan mester a debolbe.
E situacion aki a ilustra e forma cu Mike Eman a atende cu e placa di belasting di Pueblo di Aruba, cu a duna Mike e beneficio di goberna, a base di e introduccion di BBO pa asina den e recesion mundial cu tabata tin e tempo, Aruba sigui cana.
Mike Eman mes mester a guli su palabranan y bisa cu e no por deshaci di BBO, manera el a priminti y a sigui haci uzo di e entradanan extra cu BBO a produci, no pa hiba Aruba na un bon futuro, pero pa logra e destruccion financiero di Aruba.
Kico Mike Eman y su Gobierno a haci cu placa di Aruba?
Realidad di awe ta mustra con Aruba durante gobierno di Mike Eman, a paga salario y tur beneficio pa dos Ministro di Gabinete Mike Eman, cu awe a wordo sentencia na castigo di prison.
Te awe, uno di e Ministronan aki, Benny Sevinger, ta cobra su salario den Parlamento di Aruba y goza di tur loke e puesto cu Mike Eman a percura pa su persona, ta contene.
Gobernacion Mike Eman a crea cerca Pueblo e opinion falso, cu un gobernante por haci manera e kier cu placa di belasting di Pueblo mientras Ley ta bisa cu esaki na por.
Kico Ley ta bisa ta bini dilanti awe, ora Prome Ministro Evelyn Wever-Croes, manera Ley ta exigi, duna Pueblo di Aruba, prueba di e gobernacion cu el a hiba y e forma cu el a reduci tur gasto pa baha e cantidad di placa cu e ta uza pa personal di su Ministerio te na 25 porciento, compara cu loke Mike Eman tabata gasta. Esaki ta nifica cu Mike Eman a dirigi e Ministerio di Prome Ministro cu tres biaha mas tanto gasto cu Prome Ministro Evelyn Wever-Croes.
Trabou cu ta haya den Gobierno, tabata un atraccion, un forma, pa partidonan politico garantisa mas voto di hende cu asina ta wordo mara na un partido.
Awe pruebanan ta sigui subi mesa di Aruba, cu ta mira con e aparato gubernamental di Aruba a sirbi como centro pa Mike Eman como Prome Ministro por a crea gastonan cu Pueblo di Aruba no por a paga, loke a haci cu el a haya voto pero cu Aruba awor ta wordo carga cu debe, cu e Pueblo di Aruba mester paga.
Kico criterio di Gobierno Mike Eman tabata pa crea debe pa Pueblo paga, awe ta wordo confirma den Parlamento di Aruba, caminda Benny Sevinger, condena pa Huez pa prison, ta goza di un entrada mensual paga dor di Pueblo di Aruba.
DIARIO ta sigui studia tur cifra cu ta papia di e maneho financiero di Gobierno pa asina splica Aruba con awe Gobierno Wever-Croes ta tene su mes na ley y con Mike Eman a trapa riba Ley pa asina awe Aruba mester paga pa e abuso di democracia, cu ta debe nacional!
