Den Corte di Husticia e inhusticia di democracia a wordo presenta --- *Trahador di WEB kier habri porta pa Pueblo paga loke e no tin? --- *Gasto di personal di WEB mester a subi cu 10 Miyon den 14 aña
ORANJESTAD (AAN) — Ayera un trahador di WEB a bay Huez. El a opone e hecho cu WEB ta kita 12.6 porciento for di su salario, manera a pasa cu tur trahador di Gobierno y di empresanan di Gobierno.
Di acuerdo cu Ley Ministronan y Miembronan di Parlamento tambe mester haya menos placa pa asina Aruba haya yudansa di Hulanda.
Ora Gobierno a cuminsa ehecuta e exigencia di Hulanda, a bini protesta di trahadornan cu no kier entrega parti di nan salario na 2020 ora Covid-19 a dal porta di Aruba cera y asina Gobierno (cu ta Pueblo) mester a pone placa riba mesa pa tur Arubiano tin parti di nan pan riba mesa.
Pa Aruba por a sobrevivi e desaster, Hulanda a bini cu exigencianan pa baha gastonan di e pais.
E exigencianan di Hulanda no tabata sin base. E exigencianan di Hulanda tabata basa riba abuso cu a wordo haci cu placa di Pueblo di Aruba.
Na 2014 ora Hulanda a bati na porta di Aruba y Mike Eman a drenta Fort Zoutman, Pueblo di Aruba a wordo mobilisa contra interes di Aruba.
Hulanda a yega pa splica Mike Eman cu e caha di placa di Aruba tabata bira bashi.
Mike a manipula Aruba y un grupo grandi a bay manifesta contra Hulanda y no contra Mike cu a gasta e placa di Aruba cu a keda cu un debe nacional y proyectonan PPP.
Aruba mester a cuminsa tuma medida serio ora Hulanda a asumi supervision, cu tabata necesario pa asina evita cu Aruba lo a bay bancarota.
Ningun hende a hiba Mike huez ora henter Aruba for di 2018 mester a paga mas belasting, mester a cuminsa paga tur clase di prima pasobra Mike a laga debe atras pa Aruba paga.
Na 2020 ora Covid-19 a bati na porta, Aruba tabata hoga den debe. Aruba mester a presta mas placa.
E pueblo pagador di belasting di Aruba tabata tin mester di placa pa tene empresanan habri pa asina evita cu e pagadornan di belasting den empresa priva, no a keda sin entrada.
Aruba mester a tuma medida pa evita cu e grupo cu no por a traha, por a haya asistencia.
Aruba ta e Arubiano pagador di belasting cu a pasa y te awe ta pasa den mal rato si e ta traha den sector priva.
Ayera un trahador di WEB a hiba Gobierno Hues pasobra e no kier aporta cu 12.6 porciento cu Hulanda a exigi di salario di tur trahador di Gobierno pa asina Aruba por sigui cana cu yudansa Hulandes.
Gobierno a propone sindicatonan pa forma parti di un delegacion pa bay papia cu Hulanda pa baha e porcentahe. Nan a nenga.
A bay Huez.
Kico lo pasa si WEB mester paga mas na trahador? Con e prijs di awa ta subi? Ora prijs di awa subi kende mester paga? E Pueblo cu mester paga belasting tambe pa tur trahador di Gobierno.
Un trahador di WEB a bay Huez, cu mester dicidi kico ta bay socede.
Cuanto placa e personal di WEB ta costo Aruba?
Cifranan cu DIARIO a presenta den pasado, awe ta bolbe wordo presenta pa duna prueba con salarionan di WEB mester a subi cu 10 Miyon entre 2014 y 2028.
DIARIO como parti di un Pueblo den problema serio, ta en espera di e contesta di Huez cu mester dicidi si e cas nan di famia cu tanto wea bashi, mester produci yobida di oro pa un pueblo cu a bira victima di abuso di placa di Pueblo manera Hulanda a proba ora el a baha Mike for di Fort Zoutman.
Un hecho cu sin duda ta motibo cu Hulanda na 2020 a presenta exigencianan cu awe ta realidad di Aruba!
