Wardacosta ta celebra 30 aña cu actividad educativo pa 30 mucha di Plan di Mayor y Programa KIES

Wardacosta ta celebra 30 aña cu actividad educativo pa 30 mucha di Plan di Mayor y Programa KIES

Shalick Clement di Wardacosta di Caribe Hulandes

ORANJESTAD (AAN): Den cuadro di su di 30 aniversario, celebra na februari di e aña aki, Wardacosta di Region Caribe a organiza diferente actividad durante henter aña, tanto pa su personal como pa partnernan den e cadena hudicial. Ademas, e programa di celebracion a inclui actividadnan di caracter social, cu atencion special pa mucha y hobennan.

   Vocero di Wardacosta di Caribe Hulandes, Shalick Clement, a splica cu e organizacion a scoge pa dedica atencion na e grupo aki, teniendo cuenta cu Wardacosta ta recluta hobennan for di 18 aña. Segun Clement, ta importante pa muchanan por cera conoci cu e labor di e organizacion desde un edad tempran.

   Den e cuadro aki, diasabra 21 di november lo tin un actividad ameno y educativo pa un grupo di 30 mucha di Aruba, vincula na Plan di Mayor y e programa KIES. E ultimo ta brinda sosten na muchanan cu nan mayornan ta pasando den un separacion of divorcio, cu enfoke riba nan bienestar.

   Clement a indica cu Wardacosta ta colabora cu Plan di Mayor, un departamento di Gobierno, desde e vakantie grandi na juni. E actividad di diasabra ta forma parti di clausura di aña 2026 y di e celebracion di 30 aña di existencia di Wardacosta.

   Durante e actividad, e muchanan lo haya e oportunidad pa siña mas tocante e tareanan y responsabilidadnan di Wardacosta, y tambe e posibilidadnan pa den futuro forma parti di e organizacion.

   Clement a subraya cu ta importante pa sigui motiva mucha y hobennan pa haci escogencianan positivo den bida, tanto pa nan propio futuro como pa bienestar di nan famia y sociedad.