ATIA cu un peticion na tur compania y SVb
ORANJESTAD (AAN): ATIA a tuma nota cu e Landsverordening tijdelijke Loonsubsidie (Lv. Ls) a worde aproba den parlamento ariba 30 november 2021. Den diferente reunion cu SVb y Minister di Finanzas y Cultura (MinFIC), ATIA a worde informa cu SVb a paga di mas Loonsubsidie den 2020 na algun compania cu a aplica pa e ayudo basa riba estimacionnan calcula.
Alaves den e discurso di Ministro di Finanzas di 6 december 2021 ATIA a tuma nota cu 73% di e suma cu a worde paga di mas a worde paga na companianan cu ingresonan di mas cu Afl. 100,000 pa aña.
Si tuma companianan cu ingreso di mas cu Afl. 500,000 pa aña, e percentage ta baha pa 37%.
ATIA ta haci un suplica na tur compania pa tuma contacto cu SVb pa asina haci un areglo di pago pa asina paga e suma cu a haya di mas back si esaki ta aplica na e compania. Tur compania mester para responsabel pa paga e suma di loonsubsidie cu a haya di mas back como parti di nan responsabilidad social (“Corporate Social Responsibility”). E loonsubsidie tabata un vehiculo temporal pa asina yuda comercio pa sigui drey den tempo di crisis. Si e compania a produci mas cu el a premira, e ta e responsabilidad di e comerciante pa debolbe e diferencia na SVb pa asina yuda Aruba responsabilisa su mes pa e fianza ricibi di parti di gobierno di Hulanda.
ATIA lo kier corda SVb cu cada compania su situacion di likides (“cash flow”) no ta mes un cos, y cu lo tuma hopi tempo pa e perdidanan enorme di 2020/2021 worde recupera. Teniendo cuenta cu esaki, ATIA ta haci un peticion na SVb pa trata cada caso individual na un manera prudente y cu comprencion pa e companianan por haci un arreglo di pago cu no lo hinca e compania den mas problema financiero.
Tambe ATIA pa medio di su miembronan y comercio en general, a bin comprende cu tin hopi compania cu a haci “bezwaar” contra e correccion cu SVb ta exigi. ATIA ta desea di mes manera cu ta responsabilidad di commercio pa cumpli cu paga back ora a ricibi di mas, pa SVb atende y resolve e “bezwaar” cu companianan a entrega, y atende esakinan na un manera prudente, eficiente y transparente, tratando cada caso individual teniendo cuenta cu e situacion specific di e companianan y tambe nan situacion di likides. Comercio tin bon experiencia cu e manera eficaz cu SVb ta hibando e ultimo añanan aki, y ta conta cu esaki lo sigui den e manera con ta atende arreglonan di pago y “bezwaar”.
Finalmente, nos tin cu corda cu Aruba ta den un tempo di crisis ainda y nos tur tin cu traha hunto pa asina nos sobrepasa e tempo dificil aki. Cumpliendo cu SVb door di paga back e loonsubsidie, si esaki a worde ricibi di mas, lo yuda Aruba cumpli cu responsabilidad pa cu partnernan cu a haci loonsubsidie possible, cual tabata un ayudo cu a wanta nos economia ariba pia den e tempo mas dificil den nos historia.
