ORANJESTAD (AAN) – Prome Minister Evelyn Wever-Croes, a yama un conferencia di prensa, Diamars mainta, cual a tuma lugar na Instituto Medico San Nicolas (ImSan), cu a habri su porta pa vacunacion tuma lugar den e Instituto.
E mandatario a bisa cu esaki ta pa enfatiza y subraya riba e importancia di e vacunanan y e booster. El a splica tambe, cu aworaki tin e unidad movil cu ta bay den diferente bario di Aruba, pa asina yega mas cerca di tur esnan cu kier vacuna, sea cu e prome of di dos dosis, of e booster pa esnan cu bin na remarca.
Entrante e siman aki, e booster ta disponible pa tur esnan di 30 aña y mas. Prome Minister a expresa cu si mira e cifranan e ta cautelosamente optimista, pasobra gobierno a observa cu den un siman, e cifranan a cuminza baha, specialmente e ultimo tres dianan.
E mandatario a bisa cu siman pasa tabata tin tres dia sigui, cu mil caso activo cada dia, y aworaki por mira cu tin rond di 500. Ohala cu e tendencia aki continua, e dignatario a subraya, y cu por sigui domina e cantidadnan halto aki.
“Te cu ayera tabata tin 3.679 caso activo, cual ta un indicacion positivo cu e casonan ta bahando. E average di positivity rate ta halto; e ta na 63% y esey ta motibo pa keda na e nivel di preocupacion y alerta cu nos ta. Pero no ta motibo pa panico”, e dignatario a acentua.
El a agrega cu mescos na Hospital. Tin 39 persona den Hospital, segun registro. Varios di nan a yega Hospital pa algo diferente y ora a test a resulta cu nan ta positivo pa covid-19. Pero den cuido intensivo tin cinco persona so, cu Covid y esey ta toch cu ainda ta domina, bao di control.
“Nos no a sali di e problema ainda. Nos no a sali di e candela ainda. Nos mester sigui cuida”, Minister Presidente a bisa, y a agrega: “Loke si esaki ta mustra nos ta cu te ainda, e medidanan cu nos a tuma cu ta in place, ta dunando resultado. Compara cu otro paisnan por mira cu nos ta bahando nos cifanan, danki na e decisionnan importante y lihe cu nos a tuma”, Minister Presidente a remarca.
“Vacunacion, ketobay, ta e proteccion mas importante. Nos a mira cu ta duna e proteccion cu nos ta buscando pa nos mes y nos famia. No tur hende kier vacuna, nos ta respeta esey, pero nos ta urgi si tur esnan cu por vacuna, pa por fabor vacuna!” Prome Minister a reitera.
Prome Minister a bisa cu ya por mira cu esnan vacuna ta esnan menos afecta, aunke no ta un garantia cu e persona no ta haya covid-19. E por haye, pero e no ta bira hopi malo.
