Rector Viola Heutger cu bishita di cortesia na Minister Besaril
ORANJESTAD (AAN)/Den Haag – Recientemente rector di Universidad di Aruba dr.Viola Heutger a haci un bishita di cortesia na Minister Plenipotenciario Guillfred Besaril. Tambe presente na e ocasion aki tabata coordinador di departamento di Enseñansa di Arubahuis James van der Linde.
Durante e combersacion Minister Besaril a bisa di ta contento cu Universidad di Aruba a crece pa loke ta trata cantidad di facultad y studiante y tambe di mira e frutonan di cooperacion manera cu ta e caso cu Universidad di Leuven.
Rector Heutger a menciona cu sigur esaki ta positivo y tambe e otro cooperacion cu Universidadnan y Hogescholen na Hulanda. Esaki hustamente tambe ta parti di su bishita na Hulanda pa mira unda por expande cooperacion of inicia cooperacionnan nobo. Tur esaki segun dr. Heutger ta pa eleva e nivel di Universidad di Aruba pa studiantenan local pero tambe pa studiantenan internacional. Rector Heutger a duna un presentacion cortico di tur e facultadnan na Univesidad di Aruba y a amplia riba e diferente meta y retonan pa e siguiente añanan.
Dr. Heutger a mustra riba diferente aspecto di Universidad di Aruba cu mester mas atencion manera por ehempel riba e parti di investigacion.
Minister Besaril y dr. Heutger a intercambia pensamento riba e situacion di studiantenan Arubiano na Hulanda. Unda e aspecto di preparacion ta crucial. Aki Minister Besaril a bisa cu Arubahuis pa e ultimo añanan ta hungando un rol importante den e preparacion di nos studiantenan. Esaki pa medio di encuentronan na Aruba y online na unda ta tene charla y workshops riba diferente topico importante.
Na final di e combersacion ameno Minister Besaril a bisa rector Heutger cu semper Universidad di Aruba por conta riba cooperacion di Arubahuis.
Dr. Heutger a keda nombra como Rector di Universidad di Aruba dia 1 di juli ultimo como sucesor di sr. Glenn Thodé.
Potret ta cortesia di Arubahuis
