ORANJESTAD (AAN) – Mañan, Diamars 15 di Maart, a Dia Internacional di Trabao Social, y Parlamentario Ricky Hoek a referi na e dia importante aki y atencion cu e minister encarga ta poniendo riba e area aki, ademas di husticia.
“Mester bisa cu un trahador social tambe un frontliner, esaki nos por a wak den tempo di pandemia cu e trahador social ta un persona clave den cualkier situacion: den e parti emocional, psikico, psicologico, fisico, financiero, e trahador social ta un persona cu tin tools y ta yuda nos personanan pa sali di situacionnan cu ta poco dificil pa nan. E ta un trahador profesional cu na prome instancia por yega na e persona y cuminza atende cu su problemanan, sin cu e mester bay mas leu; sin yega cerca un Psikiatra, un Psicologo of un Specialista si atende cu e problema na su origen den un estado hopi trempan” e parlamentario a acentua.
Cu e presupuesto 2022 su dilanti, Parlamentario Hoek a enfoca cu Ministerio di Husticia y Asunto Social tin poni 21.6 miyon florin pa asuntonan tanto di husticia como social.
Esaki ta un aumento di 0.4 miyon florin cu ta mas cu 2% cu aña 2021. “Asina aki bo por wak enberdad cu Minister di Husticia y Asunto Social tin e aspectonan aki hopi na cuenta”, el a agrega.
Hoek a sigui bisa cu socialmente y tambe den e parti di husticia por a mira cu durante e pandemia, y awo tambe cu un guera ta amenazando nos, mester pone hopi atencion den e areanan aki.
