ORANJESTAD (AAN): Diasabra anochi banda di 7’or, ainda por a mira rij largo di hende para pafo di Rebendedornan di Lotto,
caminda publico tabata probecha ainda di hinca 4 Florin den e pot, pa mira si por logra gana e jackpot di 2.000.000 Florin cu tabatin pa e sorteo di Lotto 5.
Hasta e Helicopter di Polis a cuminza bula rond e momento ey pasando riba e areanan unda semper tabatin ‘situacion’ incomodo cu ta socede ora cu tin benta grandi asina.
Y pa 7:45 pm e sorteo mes a cuminza, y e presentador Isai Labadie a canta e numbernan cu a sali e anochi ey.
Y a resulta cu rond di henter Aruba, ta un solo ticket tin cu e numbernan 05, 19, 20, 23, y 30.
Fundacion Lotto pa Deporte a confirma cu un solo ganador a bay cu e 2 miyon Florin aki, y e ticket ganador a wordo bendi na Manton Lottery cu ta situa na Sabana Basora.
Pa Diaranson awor, e sorteo cumulativo ta bek na 100.000 Florin.
