Expertonan ta guia DIARIO den e resultado historico di proceso electoral 2021 - *Constelacion nobo di Parlamento mester coregi buraco moral den leynan - *Circo politico mester a sconde sobrevivencia di crisis financidero y pandemia
ORANJESTAD(AAN—Durante y despues di e proceso pa Pueblo pa medio di eleccion dicidi riba futuro di e pais, un circo politico a wordo crea pa sconde e berdad cu mester a bini dilanti pa Pueblo por a huzga cual ta e politiconan cu merece su confiansa pa goberna di 2021-2025.
Den otro articulo awe, DIARIO lo duna prueba con un circo politico a wordo forma dor di Mike Eman, cu entre otro mester a mustra Pueblo pakico no por a conta cu su contribucion na momento cu Aruba mester a soluciona e crisis financiero cu el a laga atras y tambe lucha den un pandemia, cu mes efecto mundial cu Segunda Guera Mundial.
Den e proceso pa eleccion, varios arma a wordo uza dor di sigur AVP pa hala atras e contestanan cu Mike Eman debe Pueblo for di 2017, ora el a bay laga Aruba atras cu un debe nacional y debenan di PPS cu el a regla hunto cu Benny Sevinger pa no papia mes di Citgo, cu tabata un benta di interes di Aruba cu Nicolas Maduro cu asina a provoca un crisis economico pa Aruba.
E debatenan di Camara di Comercio di Aruba a wordo sigui pa encuesta den cual Pueblo di Aruba na forma abrumador a duna Evelyn Wever-Croes e sosten pa dirigi pais Aruba.
E resultadonan di encuesta cu a wordo haci door di Camara di Comercio a mustra claramente cu Pueblo di Aruba tabata tras di Evelyn Wever-Croes como su lider pa futuro y aki por mira con e furia di oposicion a aumenta.
Den otro articulo DIARIO lo mustra con Mike Eman a crea un cortina di huma pa kita atencion for di asuntonan importante pa cual e mester a duna cuenta y razon.
DIARIO a busca contesta di diferente expertonan riba tereno politico cu a indica, cu den e detencionnan cu a cay den e caso Avestruz por a mira e diferencia den e forma cu AVP a lanta para contra ciudadanonan, cu por cierto ta conoci como hende di AVP y e forma cu AVP a actua cu e detencion di Benny Sevinger.
Segun e expertonan por mira cu AVP por a haci remarke pero no a crea e atake total riba e sistema legal di Aruba, loke si a pasa ora Benny Sevinger a wordo deteni.
Informantenan ta indica cu ora mira e caso di Sevinger, Avestruz, ta mira cu acusacion di tur e otro detenidonan tabata mara na nan relacion cu Benny Sevinger den asunto di tereno, loke ta haci Benny Sevinger e persona central den e investigacion di e proceso penal.
Expertonan ta bisa cu si Mike Eman ta considera su mes un lider di Aruba, e ta mira bienestar di Aruba y e lo a splica como lider cu como sospechoso Benny Sevinger no ta postula como candidato pero cu Benny Sevinger ta mantene e derecho pa na momento cu e wordo absolve di tur sospecho (si esaki socede) e por participa den futuro na un eleccion.
Expertonan a bisa cu esaki ta loke ta pasa cu tur acusado cu tambe den nan circulo di trabou ta wordo afecta cu e investigacion cu ta completamente segun nos sistema legal.
E parti mas importante di e e asunto ta, cu eleccionnan ta pa Parlamento, cu ta e centro di e sistema legal di Aruba y e representacion directo di Aruba.
E miembro di Parlamento directamente ta atende cu e leynan cu ta base di Estado di Derecho Aruba.
Awor kico ta pasa cu admision di Benny Sevinger den Parlamento?
Expertonan a mustra DIARIO e parti legal di e asunto.
AVP a pone Benny Sevinger na final di nan lista pero na mes momento a pidi hende pa vota pa Benny, mientras AVP tabata pone e base di nos sistema electoral na discusion manera den otro articulo ta wordo splica.
Si Mike Eman kier a tene Benny Sevinger riba lista e mester a laga Benny Sevinger back to back cu su persona pero el a manda Benny Sevinger pa number 29 despues di a negocia cu Benny henter anochi ariba participacion di Benny na e lista.
Pa comprende loke a pasa mester tene cuenta cu den articulo 96 di ley di eleccion, “voorkeursstemmen” (votonan di preferencia) ta wordo regla.
E articulo aki ta papia di candidatonan cu haya mas voto cu mita di e asina yama “lijst kiesdeler”, cu awor ta wordo splica.
Den caso di AVP stemcijfer di AVP tabata 18.348. Si deel esaki door 7 bo ta haya e lijstkiesdeler cu ta 2.621.
Segun ley e candidato riba lista di AVP cu tin mita di e cantidad aki, tin preferencia pa drenta Parlamento.
Basa riba ley Conseho Supremo Electoral segun articulo 103, lid 1, mester manda dentro di 3 dia despues di establecimento di e resultado di eleccion un anuncio pa Benny cu el a wordo eligi.
Benny tin 5 dia pa manda bisa cu el a ricibi e gekozenverklaring (art. 104, lid 1.) Lid 2 ta bisa cu Benny tin 2 siman pa dicidi cu e ta acepta su eleccion. Si esey no sosode ta wordo asumi cu e no ta acepta cu el a wordo eligi pa drenta Parlamento.
Na momento cu Conseho Supremo Electoral haya e carta cu Benny ta acepta cu el a wordo eligi, un carta mester bay pa Parlamento y pa Benny mesora. E documentonan aki ta forma parti di su credencial pa e por huramenta pa drenta Parlamento.
Benny Sevinger tin tres siman pa entrega su credencialnan na Parlamento. Si e no haci esaki, e asiento ta wordo declara liber pa otro candidato ocupa.
Na momento di entrega di su credencialnan, Benny mester splica tur funcion publico cu e ta ocupa.
E credencialnan di Benny Sevinger ta bay Parlamento cu ta dicidi si e por bira miembro.
No tin ningun ley cu ta bisa cu Benny Sevinger no por drenta Parlamento aunke e ta den prison pasobra ley solamente ta cera porta pa Parlamento ora tin un sentencia irevocabel di Huez.
Ta keda pues na e parti moral di cada partido pa dicidi si nan candidato ta keda of hasta ta wordo admiti den Parlamento mientras e ta un sospechoso of hasta den prison manera a socede actualmente.
Informacionnan cu DIARIO a ricibi ta splica cu Benny Sevinger a haya permiso pa bay presta huramento pa drenta Parlamento siendo detenido den prison, loke ta marca atrobe historia di Aruba, cu ya ta confronta un situacion serio den bista di mundo.
Informantenan ta indica cu e prome paso di e constelacion nobo di Parlamento mester ta, pa cambia ley di tal forma cu sospechosonan di ley y personanan deteni no por participa na eleccion ni drenta Parlamento!
Pa informantenan politico ta sumamente tristo cu na momento cu Pueblo di Aruba mester a bay huzga pa kende vota a base di e maneho cu gobiernonan a hiba y den cual Mike Eman mester a duna cuenta y razon pa loke el a haci cu Aruba, Benny a wordo uza pa crea un cortina di huma emocional.
