Segun comerciante Marjorie Vermeer-Luidens:
ORANJESTAD (AAN): Den su declaracionnan cu comerciante Marjorie Vermeer-Luidens a duna den un entrevista na DIARIO, el a subraya cu Aruba ta den un momento crucial pa turismo comparando turismo cu varios cos entre otro un premio cu no sa con lo haci uzo di dje y covid. Tambe segun e, mundialemente turismo y sobre populacion di e tempo aki ta manera un tsunami. Hopi no ta wak turismo como algo bon mas.
“Nan ta wak e manera un covid cu ta drenta un pais y ta caba cu ful e pais y ta tuma over”, el a expresa.
El a splica su comparacion bisando cu turismo ta trece placa y tur hende ta cay p’e y tur regla ta wordo perdi. Ehempel di esaki ta e expresionnan cu Arubianonan ta haci di loke un turista ta pensa di nos cayanan den mal estado. Segun e, nos mester ta preocupa kico nos cu ta biba aki ta pensa cu nos cayanan ta den mal estado.
El a remarca cu turismo por traha y por kibra Aruba y a splica con e ta wak e tempo aki como un tempo hopi malo. Mientras nos ta papia di un tsunami di turismo, tur cos mester wordo reglamenta pa lor’e y carg’e manera ta mas di un yiu a haya pareu pa despues bay cuida nan.
Sinembargo, segun e, no tin un vision of sabiduria. Aruba tin e problema grandi di gobierno. Gobierno ta sirbi pa un periodo di 4 aña y aunke cu e por a traha bon y bin cu hopi bon idea, ora di cambio di gobierno, tur cos ta cambia, para y hasta ta elimina e vision di e gobierno anterior, aunke con bon e tawata.
El a subraya cu gran parti di nos hendenan ta traha cu turismo. Turismo ta un rosea cayente cu tey 24/7. Hasta Pasco of dianan nacional di fiesta. Esnan cu ta traha den turismo mester bay traha hasta overtime pa sirbi e turistanan. Mamanan cu ta traha den e sector aki, hopi biaha ta traha dos trabou, overtime, dianan di fiesta, y riba nan off day y no tin tempo pa yiunan mientras e yiunan ta keda cas nan so y hopi ta cay den e mal caminda. “Nos ta perdiendo nos mes y nos muchanan”, el a bisa.
Mientras cu, segun e, tur hende ta bisa cu turismo ta algo bon cu ta pasa nos, el a remarca cu tur señal tey cu Aruba no por carga mas turismo. “Of nos kier bira grandi y tene man hunto, of nos tur ta muri. Esaki ta e preocupacion mas grandi cu tin”, señora Marjorie Vermeer-Luidens a duna di conoce.
