Solange Tchong, PR di AZV: --- *Incluyendo pashentnan di AZV
ORANJESTAD (AAN): AZV a wordo informa, Diaranzon atardi, cu ta hopi importante pa tuma nota di un cambio di maneho cu Ministerio di Salud Publico di Colombia a haci, unda nan a tuma e decision cu tur persona stranhero, y den e caso aki tambe e aseguradonan di AZV, no por drenta e pais pa cuido medico, si no ta vacuna.
Asina e Relacionista Publico di AZV, Solange Tchong, ta duna di conoce.
“Manera ta conoci, Colombia ta un pais cu nos ta haci uso di su servicionan medico pa hopi aña caba, vooral pasobra tin bon e experiencia cu nan clinicanan, pero esaki a resulta cu retonan nobo pasobra Colombia, pa e mesun situacion di e pandemia di coronavirus, cu aworaki ta sigui afecta e pais, a dicidi pa haci cambio den nan maneho y cambio di decision” Solange Tchong a indica.
Esaki tin consecuencia tambe pa comunidad di Aruba, door di e hecho cu enberdad, desde 14 di December 2021, e Ministerio di Salud di Colombia a dicidi cu tur persona stranhero, na momento cu kier haci uso di servicio medico na e pais, mester tin nan schedule di vacunacion completo y esaki ta nifica cu tur persona cu drenta mester tin e dos dosis di e vacuna contra covid-19, y mester hacie 14 dia prome cu su vuelo, si e tin intencion di haya tratamento medico ayanan.
Tchong a sigui bisa cu esaki ta cambia e panorama pa Aruba ya cu manera ta conoci AZV tin semper su pashentnan cu ta bay afo y e aña aki tin alrededor di 620 pa 630 pashent cu ya caba a wordo yuda door di Colombia, pero esaki ta cambia un tiki e situacion den sentido cu tur e pashentnan cu ta pendiente di bay Colombia pa cuido medico, mester tene cuenta cu e maneho nobo aki di su Ministerio di Salud.
E exigencia ta, tin e dos dosis di e vacuna, 14 dia prome cu e vuelo, of mester por presenta un certificado of comprobante di un PCS negativo, 72 ora of menos prome cu bay biaha.
Esaki ta conta pa e vuelonan di aerolinea comercial y specificamente pa AZV y su pashentnan y e ta nifica cu hasta ora ta caso di emergencia, es decir cu e persona tin cu sali cu air ambulance for di Aruba pa bay Colombia, e mesun regla ta vigente.
“Nan ta pidi pa casonan di pashentnan di emergencia tambe mester tin e dos vacunanan, of minimo un angua (un shot) y banda di esey un PCR test negativo”, Solange Tchong a remarca.
E motibo pa cual AZV ta trece esaki dilanti cu hopi enfasis, ta pasobra e institucion kier recomenda tur pashent cu ta pendiente pa nan vuelo, pa tuma nota di e regla aki.
“Pero na mes momento nos kier, pa nos tur como asegurado di AZV, ta na haltura di e regla pasobra manera nos sa, malesa semper por bati na porta. Bo no kier pa esaki sosode y ta importante pa tuma nota di esaki” Solange Tchong a reitera.
Clinicanan di Colombia cu ta duna servicio na pashentnan di AZV ta Fundacion Cardiovascular, Fundacion Santa Fe de Bogota, Fundacion Valle de Lili, Hospital Internacional di Colombia, pues tin varios clinica cu AZV ta traha cune, y esaki ta referi cu Aruba tin cu tene su mes na nan regla.
“Sigur pa AZV su departamento di cuido medico den exterior, ta bay bira un informacion cu ta bay wordo duna na tur asegurado pendiente pa sali pa Colombia, pasobra e ta bay rekeri di un extra exigencia cu Colombia ta pidi y cu AZV mester cumpli cune” Solange Tchong, PR di AZV, a reitera.
