Ing. Marlon Croes, director di DOW:
ORANJESTAD (AAN) – Den conferencia di prensa di Departamento di Obranan Publico (DOW), su director Ing. Marlon Croes a yama un conferencia di prensa, den cual a duna informacion tocante un proyecto na Green Corridor, cu lo cuminza otro siman, cu un duracion di dos siman largo, y cu ta trata di mantencion di e brug di Spaans Lagoen.
Marlon Croes a splica cu e compania contratista lo tin cu haci un inversion relativamente grandi riba e brug di Spaans Lagoen. El a splica cu segun e contrato, mantencion ta responsabilidad di e contratista, y mantenimento di e brug ta algo rutinario cu mester tuma lugar y esaki ta e prome biaha cu lo sosode, na e forma extenso aki.
Croes a menciona cu DOW, como Contractor Authority di Gobierno, segun e contrato tin e obligacion tambe pa duna e compania contratista ODINSA, e oportunidad pa haci e trabao di mantencion y cu ta algo bon pa ambos partido: e contratista y gobierno, pa nan haci mantenimento preventivo pa e brug keda bon den e siguiente 18 pa 20 añanan.
“Pa haci e trabao aki tin diferente reto cu nos tin cu enfrenta. Un di nan ta, cu nos a sinta cu tur nos stakeholders cualnan ta DTI, KPA, Arubus, Brandweer y Ambulance. Esey, pasobra den e trabao cu nos ta bay haci, tin cu cera e brug pa e trabaonan por tuma lugar. E solucion cu a scoge ta esun cu ta garantiza di mitiga e riesgonan pa e trahadornan y tambe pa e trafico, cu ta haci uso di e brug aki. Gobierno y DOW como Contractor Authority tin e meta pa tur e mantencion grandi aki unda ta cera caretera lo mester tuma lugar den vacacion grandi pa evita molester severo den trafico”, director di DOW a señala.
E funcionario a agrega cu, naturalmente, ora e trabao tuma lugar e contrato ta funciona, y tin cierto articulo cu tin cu aplica riba dje. E trabao lo inicia e proximo dialuna, dia 25 di Juli, di 9 or di mainta pa 7 or di anochi, unda cu lo cera e caretera for di e rotonde di Kibaima (cu ta bao di mantencion di WEB) te cu e rotonde di Pos Chikito. E mantencion ta encera ariba e top di e brug unda ta bay haci trabao di ensambla, kita sushi y verf e brug. Esaki ta trabaonan preventivo pa evita cu e ta empeora, y desviacion di e trafico lo bay tuma lugar via e camindanan cu ta bay wordo indica.
“Nos ta bay haci uso di e brug bieu di Tele-Aruba, y tambe e trafico di San Nicolas pa Santa Cruz y viceversa pa haci uso di Mondi Fierno y Franse Pas, pa yega e otro destinacionnan. Despues di 7 or di anochi lo habri e brug aki parcialmente, unda cu e ekiponan pisa lo keda na mitad di e brug y e dos lineanan mas pafo lo keda pa e trafico normal durante e oranan aki” Ing. Croes a relata.
Pa conclui el a reitera cu e trabaonan aki ta rutinario y lo sosode cada cinco aña. Esaki ta e prome fase, y otro aña ta e pianan di e brug.
