ORANJESTAD (AAN) – Actualmente, no obstante cu Covid-19 ta sigui vigente, y cu tin e variante nobo Omicron, turistanan ta sigui bin Aruba y por ripara mira nan presencia den ciudad, den areanan di hotel sigur, restaurant, lugarnan di recreacion, den safari, etc., etc.
Desde e momento cu nan ta yega Aruba, specialmente esnan cu ta bin Aruba pa prome biaha, ta na expectativa di con nan lo bay wordo ricibi, por ehemplo, pa Imigracion cu ta e prome lugar unda nan ta experiencia e trato di e Arubiano.
Esaki ta hopi interesante, y mester valora e trahadornan cu ta esmera pa duna un servicio di calidad halto, na cada bishitante cu ta check in.
Den algun oportunidad, DIARIO por a scucha disgusto cerca un ke otro hende local, cu no ta haya cu e trato na imigracion pa su persona tabata esun corecto y adecua, y incluso cu a yega di bisa: “ban spera cu nos turistanan si haya un bon trato”.
No obstante, cerca turistanan mes te unda DIARIO por a haya sa, no tin keho y tin di nan cu ta haya e personal di imigracion hopi great, amable, y amistoso; hasta tin cu ta compara e trato di imigracion di Aruba cu cierto paisnan unda nan a pasa den algun experiencia desagradable.
Kiermen, e servicio di Imigracion no solamente ta importante pa hiba control di e pasaheronan, cu tur nan documentonan ta na ordo y corecto, y pa cuantifica cuanto turista ta bishita Aruba, pero tambe, y hopi mes, como e prome cara cu e bishitantenan ta topa cune, cu sigur ta influencia nan animo y por haci nan sinti mas confortable y confia di a scoge e Isla Feliz aki, como nan destino turistico. Obviamente, e trabao di imigracion no ta uno facil, e ta genera presion y stress specialmente den temporadanan hopi druk, pesey ta tambe importante, pa reconoce cu Aruba ta dispone di un Personal di Imigracion sumamente capacita y conciente cu nan trabao ta esencial pa e crecemento di Aruba su turismo.
