Tisa LaSorte, CEO di AHATA:
ORANJESTAD (AAN) – Tisa LaSorte, CEO di AHATA, den un entrevista a señala cu na Aruba, mescos cu otro paisnan, tin scarcedad di hende pa traha den e sector turistico. Prome cu e pandemia caba ya tabata tin problema pa haya hende pa traha den e sector di hospitalidad.
LaSorte a splica cu e tin di haber tambe cu Aruba ta un mercado chikito, pues tin un forza laboral limita tambe. AHATA actualmente, ta trahando cu e tipo di scolnan cu ta ofrece e tipo di facultadnan aki na Aruba, pa wak con por yuda nan y apoya nan pa mas hende drenta scol, pa scol mes por duna nan un bon estudio, y esnan cu sali despues ta inspira tambe pa traha den e sector.
Actualmente AHATA ta trahando hopi di cerca cu e director nobo di Enseñanza pa Empleo. Nan ta trahando riba un programa pa por yuda nan pa traha un curriculum cu ta pas cu e tipo di trabaonan cu mester den e sector di Hospitalidad. AHATA no solamente kier apoya nan pero yega na certifica e cursonan aki pa bira oficial, pa despues nan por drenta traha.
LaSorte a indica cu hopi ta wordo papia di training, y dunado di trabao tambe ta duna training pa cierto trabao, pasobra si mester di un persona pa traha den IT, logicamente e mester sa di computer y nan ta haya training.
Pero tin hopi trabao den restaurant, pacus of hotel cu por training ora nan cuminza traha. No obstante esaki no ta e problema sino cu no por haya e candidatonan. Pues pa ofrece un training na un hende, e mester aplica pero no tin e cantidad necesario. AHATA ta haciendo hopi pa inspira e muchanan na scol, inspira e comunidad pa nan compronde mas e variedad di trabao cu tin den e sector, y inspira nan pa tuma e trabaonan aki.
Mayoria di dunadornan di trabao ta dispuesto pa duna e trainingnan aki, pero di candidato mester. Otro problema cu tin ta cu den hopi di e trabaonan aki e persona mester traha den fin di siman, den horario di anochi, y esey ta loke hopi hende na Aruba no kier haci. El a subraya cu no tin e cantidad di hende na Aruba cu tin e deseo di drenta traha den e sector di hospitalidad.
