Diego de Cuba, President di Sindicato STA:
- Nan kier ‘the right person in the right place’
ORANJESTAD (AAN): Diego de Cuba, kende ta presidente di Sindicato di Trahadornan di Aruba (STA), den entrevista cu Matutino DIARIO a splica cu tin cosnan den e maneho di Aeropuerto cu STA kier elimina, y esaki ta un tema cu a bin dilanti durante e reunion cu Gerencia di AAA NV.
STA a bisa cu nan kier “the right person in the right place” y nan tin hendenan capacita den e compania, pero tin un grupo cu STA ta yam’e “Committee selectivo” cu ta reuni y bisa cu “personanan A,B,C” nan ta tuma, pero “D,E,F” nan no ta tuma, pa cierto motibonan.
Segun de Cuba e personanan A,B,C ta mas califica cu D,E,F, y asina ey, nos di Sindicato STA ta wak cierto cosnan cu a pasa cu ta completamente fo’i sla. El a agrega cu e dia cu tabata tin incidente cu Cuerpo di Seguridad, tabata tin mas cu 80 empleado cu a bay den protesta y STA a pidi un audit riba dje, pero lamentablemente nan ex-colega Carlos Rojer cu tabata dirigi e audit e tempo ey a haya un accidente y Dios a tum’e, y e tambe tabata di opinion cu lo cual a sosode eynan tabata completamente fo’i sla.
“Con bo ta bay tuma un persona den posicionnan clave, cu apenas tabatin seis luna trahando, of menos cu un aña, anto nan exigencianan tabata tres aña, pero pa bo forma un grupo rond di bo, anto aworaki bo no tin control riba nan. Kico ta pasa e ora ey ta cu e ta bira un free for all anto p’esey hopi problema ta surgi den aeropuerto, ultimamente. Y locual cu a pasa eynan no mag di ripiti mas. Anto e cosnan aki nos a trece nan na oido tambe di e director interino actual James Fazio, y nos a lesa den prensa cu e ta bay tuma e batuta over”, Diego de Cuba a señala.
De Cuba a señala cu esaki ta cosnan cu STA a papia tambe cu e minister, y nan a splik’e cu “e cosnan aki a sosode y nan no mag di sosode mas”.
