ORANJESTAD (AAN): E siman aki Directie Arbeid en Onderzoek (DAO) a habri oficialmente e portanan di ‘Tienda Legal Laboral’ (TLL) na MFA Savaneta.
E proyecto piloto innovativo aki ta marca un transformacion importante di loke ta e seccion di Conflicto y Retiro. Cu apertura di un localidad nobo den MFA Savaneta, DAO ta trece conseho laboral y informacion preventivo literalmente mas cerca di e ciudadano.
For di conflicto pa prevencion: Lansamento di Tienda Legal Laboral ta mas cu simplemente un cambio di nomber; e ta representa un manera nobo di traha y di ta proactivo. Caminda antes e enfoke tabata riba soluciona conflictonan laboral cu a surgi caba, TLL ta fungi awo tambe como un centro di informacion central enfoca riba prevencion.
Door di informa trahado y dunado di trabao den un fase trempan tocante nan derechonan y debernan, TLL ta aspira na un mercado laboral mas sano y transparente na Aruba.
Accesibel y den bario: Un punto clave di e proyecto piloto aki ta e accesibilidad. Cu Tienda Legal Laboral nos ta baha e drempel pa conseho significativamente, door di ta presente den bario, cuminsando cu MFA Savaneta. MFA Savaneta ta e prome localidad cu ta habri su portanan, y pronto lo sigui cu otro MFAnan riba e isla pa asina por ofrece e servicio aki na mas luga pa brinda apoyo den un ambiente neutral y di confianza.
Tienda Legal Laboral ta aspira pa brinda servicio basa riba cinco pilar: Husto, Profesional, Servicial, Uniforme y Accesibel. Sea ta trata di pregunta tocante pago di salario, control riba relacion di trabao, contrato laboral of mediacion den conflicto laboral; Tienda Legal Laboral t’ey tanto pa e trahado como pa e dunado di trabao.
Pa mantene e drempel mas abou posibel, Tienda Legal Laboral lo funciona a base di ‘intake’. Nan lo purba atende ciudadanonan mesora segun disponibilidad. Si esaki no ta posibel, lo yuda traha un cita pa un otro momento. Pa awor e horarionan pa ‘intake’ ta di Dialuna pa Diabierna: 8:00 am pa 12:00 pm, y di 1:00 pm pa 3:30 pm. Excepto Diaranson cu ta di 8:00 am te cu 12:00 pm.
E proyecto piloto ta drenta na vigor oficialmente na MFA Savaneta (Savaneta 121-F). Pa ciudadanonan cu ta prefera di haya informacion via telefon of e-mail prome, Tienda Legal Laboral ta disponibel temporalmente via 593-2107, cu email: Cette adresse e-mail est protégée contre les robots spammeurs. Vous devez activer le JavaScript pour la visualiser.
Departamento di Labor y Investigacion ta invita e comunidad completo pa bin cera conoci cu e forma nobo di servicio aki. Hunto nos ta traha riba husticia na pia di trabao, eynan mes den bo bario.
