Directora Luenne Gomez-Pieters a duna di conoce:
*Formulario di IB lo sali na Juli
ORANJESTAD (AAN): Directora di Departamento di Impuesto, Luenne Gomez-Pieters a indica cu nan team di control na 2022 a pasa den un trayecto di preparacion pa ora cu BTW lo a drenta na vigor. A pone un 'opleidingtraject ' special pa e team di control y esaki no a caba ainda.
Gomez-Pieters a splica cu BTW no a drenta na vigor, pero si tin cierto cambionan den BBO. Ta bay tin un reunion cu e team aki pa wak e plan di control pa implementa esaki.
Lo bay mira cu e team di control lo mester bay haci bishita pa controla e administracion di negoshinan si nan ta cumpli of no, a remarca.
El a sigui bisa cu lo selecta e negoshinan a base di risico, caminda cu e risico ta mucho mas grandi cu e incumplimento. Na e negoshinan lo cuminsa controla e bukinan.
Door di e pandemia a pone un paro na e controlnan. Awor den 2023 tur team ta ekipa pa haci nan trabao y nan ta bay subi caya pa haci e controlnan necesario, ya sea pa medio di e sistema cu DIMP tin of pa medio di bishitanan.
Esaki lo conta pa loonbelasting, BBO, grondbelasting, winstbelasting, etc. E aña aki ta un aña cu ta den luz di cumplimento. DIMP di su banda ta cumpliendo cu e contribuyentenan. A elimina e retraso cu tabata tin pa loke ta retribucion di impuesto.
Ta procesando caba e formularionan di Inkomstenbelasting (IB) di 2021. Pa luna di April kier ta cla cu esaki y ful cla cu retribucion, den spera di e formulario di 2022 cu lo sali na Juli, a señala.
Luenne Gomez-Pieters a splica cu DIMP tin 40 mil contribuyente di IB y kier bay digitalisa tambe e fluho aki pa por procesa e datonan mucho mas mihor.
Tin algun proyecto ainda pendiente pa e contribuyentenan y un di nan cu ta bon pa menciona y cu e contribuyentenan lo mira e balor agrega ta cu e estado di cuenta di un contribuyente na DIMP, nan lo por bay mira den e plataforma digital di BO Impuesto. Tambe lo por haci areglo di pago, el a indica.
