Trabaonan di construccion di rotonde ta cuminza otro aña
ORANJESTAD (AAN): Durante un conferencia di prensa director di D.O.W Ing. Marlon Croes a papia riba e situacion di e caminda na Palm Beach cu te ainda tin baricada, cerca di cruzada di Wendy’s.
El a splica cu e documentonan pa e destaho publico ta cla y cu e trabaonan lo inicia na 2022 pa caba cune den un manda.
“Si nos cuminza cune e aña aki ta bay tin e vakantie di construccion na December y esey lo pone cu bo ta keda cu un cruzada cu ta habri”.
Nos no ta desea esey, pues nos ta cuminza e trabaonan di reconstruccion na e cruzada aki pa e bira un rotonde, na 2022, segun Croes.
El a sigui bisa cu for di awe te cu e periodo di inicio di e trabaonan na e cruzada di Palm Beach, D.O.W lo tuma algun medida preventivo pa baha velocidad di e autonan cu ta pasa riba e caminda aki.
Pesey D.O.W a sinta cu Cuerpo Policial pa analiza na unda mayoria di e accidentenan a tuma lugar.
Basa riba esaki otro siman anochi lo cuminza pone algun plateau temporal pa baha velocidad di auto.
E director a bisa cu den transcurso di e proximo dos simannan lo finaliza ponemento di tur otro plateau, pa por habri e cruzada aki na un manera responsabel bek.
